Asingger La so Balon Mundo!

SARAY proponi so daakan ed panambal na saki-sakit ed mundo. Diad karaklan, mankaukolan ira na paga tan pitulongan, ontan met ed manunan mantunosan a sagpot na amin a nasyones ed sankamundoan. Wala so liknaan a legan a saray kipapasen so oneges, say pankaukolan na mandamayan a kipreserba et mamilit ed saray nasyones pian osisaen lamet iray pangiyuna tan mankimey a mankakasakey a mamorma na sakey a balo tan makasuportan mundo. Isipen a satan so mamawas ed kuarta a parad militar diad pankaabigan ed pangusar na saray kayaryan pian nabawasay sesga ed kaliberliber tan unong, a naimano na State of the World 1990 ya, “imbes a pansiansiaen so dili ran baleg a depensa iran establisemento, nayari ya onsabin saray gobierno et onsalar ed sakey a baleg a kalaknab tan mamabiskeg ed puersan manamasiansia-na-kareenan a N.B., sakey a nawalaan na pakayari tan pakauley a mangidepensa ed siopaman a membro na bansa a sumpad sakey a manangatake.”

Ingen onsaew iray ontan a plano ed pangitarok na kipapasen a panpipirawetan a sikaray nilista ed panangilukas iran pahina tayo. Saray panangimaneho na katooan labat et agmakatambal na makasalanan a katooan tan kaagapan; agda naekal so panbibiigan tan etnikon kolkolan; agda mamawalay agsinisiblet ya aro ed limog na amin a katooan; nisay nagarantian da so panganga na sakit tan patey. Say krimen so ag-epektibon naresolbe, nisay wala so anggan dinan a pamitla ed panalona na saray relihyoson balingaan tan panamusol. Tan anggan say pangekal na natural iran desyang so agnayarin nikuenta. Say nasyonalismo, pati say ilaloan ed pansengegan na saray problema, so naabuloyan a mansiansia. Agmaliket, sirin, napasampot tayo a sinmaew iray katooan a makasabi ed sakey a praktikal a solusyon.

Ingen, wala so solusyon! Peteg, ya amin a sarayan bengatlan panpirawatan parad katooan so walan nisipan, tan say sipan so nanlapud Dios ya “agmakapantila.” (Tito 1:2) Kabat ton eksakto no anto so nepeg a gawaen, tan sikato so walaan na kakabatan, say pakayari, tan say abilidad a manumpal no anto so walan ginagala to.​—Apocalipsis 7:​12, 19:1.

Insipan na Dios: “Ta wala ni lambengat so daiset, tan say marelmeng so naandi la; tan imanom so pasen to, tan sikato so naandi. Balet saray mauyamo tawiren da naani dalin, tan maliket ira a dili ed inkadaakan na kareenan.”​—Salmo 37:10, 11.

Panon iyan nasumpal? Onebat so Isaias 11:​9: “Agda gawaen so dinan man a panamasakit odino letnegan na anggan kaderal ed amin a masanto a palandey ko; ta say dalin napano naani ed pikakabat ed si Jehova a singa saray danum sakbongan da so dayat.” On, amin a katooan so nabilin ed “pikakabat nen Jehova,” tan siopaman a sinansakey a katooan ya onsungay a manumpal diman naani so agnaabuloyan a mansiansia tan maneral ed kareenan na arum. Say marakep a dalin tayo so agla naderal.

Isisipan na Salmo 46:8, 9 a “Nengnengen iray aktibidades nen Jehova . . . Paandien to so bakabakal ya angga ed sampot na dalin.” (Nengnengen met so Miquias 4:3, 4.) Sakey a makanan sengegan na panggawa na en-globon kareenan so panganga na nasyonalistikon pandudumaan. Say pikokoopera so nagarantiya, ta saksakey lambengat a gobierno so niwala ed sankamundoan​—salanti na Dios. Tan say gobierno to so sakey a Panarian “ya aglan balot naderal.” (Daniel 2:44) Niarum ni, say Ari to so apaoli, ag-ompatey a si Jesu-Kristo, a say panuley to et diad panamegley na inkahustisya tan inkatunong.​—Isaias 9:6, 7; 32:1.

Balet kasin saya so deralen naani ed panamegley na atawir ya ag-inkayadyari tan naamper ed manpatuloy ya ot-ot, sakit, kaermenan, tan patey? Andi, lapud ta saraya met so bengabengatlan linmabas. Pabiskegen itayo na Apocalipsis 21:​4: “Tan punasen to so amin a lua ed kamataan da, tan anggapo la so patey, nisay pannangis nisay pandageyem nisay ot-ot. Saray gendat a bengatla naandi la.” Say atawir a kasalanan so naperdona a nibase ed dondon bagat nen Jesus, tan say katooan so nipawil ed sakey ya ayadyarin kipapasen. (Roma 6:23; Efeso 1:7) Tan siopa so magmaong a mangontrol ed palsa iran puersa tan gawaen tora ya agmanrisgo ed katooan et say Amalsa ed sikara?​—Salmo 148:5-8; Isaias 30:30.

Saray bengatlan nayarin mogmong paniilaloan tan kugkugipen na too, so iter na Dios. Balet kapigan? Ituro na propesiya na Biblia a satan iran pansalat so onsabi ed panaon sano saray nasyones et “onsanok” tan say too et “manederal ed dalin.” (Apocalipsis 11:18) Say kaunoran ya agew na daan a mundo so namarkaan ed panamegley na “kritikal iran panaon a mairap a pidenengan”​—a manresulta ed oneeges iran kipapasen a nanenengneng tayo ed liber tayo natan. (2 Timoteo 3:1-5, 13) Tan impasakbay nen Jesus a say kailalakan a makakanengneng ed ontan iran bengatla so kailalakan a makanengneng ed kasumpalan na propesiya na Dios.​—Mateo 24:3-14, 32-34.

Mangalay panaon a manosisa ed saraman a sipan a nikurit ed Biblia. Lapu ed sayan punto, a namparan makabat iran lalaki so mikasakey ed Dios: Natan la so panaon parad sakey a balon mundo!