Sakey a Gobiernon Gawaen to so Agnagawaan na Too
“Galidia, sikayon totoo, tan nengnengen yo so gawagawa na Dios. Say pidedeneng to ed saray anak na totoo so makapataktakot.”—SALMO 66:5.
1, 2. (a) Panoy pangipanengneng na nanengneng a talba ed makapakelaw a biskeg na Amalsa? (b) Akin a manisia itayo ed ibabaga na mapropetikon Salita na Dios nipaakar ed panaon tayo?
SI JEHOVA so walaan na pakayarin manggawa ed agnagawaan na too. Diad pangiyilustra: Saray totoo so mankelkelaw ed biskeg na bomba nuklar; balet say biskeg to so melmelanting labat no ikumpara ed biskeg na agew tayo. Ingen say agew so sakey lambengat ed saray ngalngalin 200 bilyon a bibitewen ed galaksi a Milky Way lambengat. Kinalkulo na saray astronomo a diad interon talba et wala so nayarin ngalngalin 100 bilyon iran galaksi, a kada sakey et walaan na binilbilyon iran bibitewen. Agaylan makapakelkelaw a biskeg so kinaukolan diad impamalsa ed amin na saratan! (Isaias 40:26) Sayan makapakelaw a pakayari na Amalsa so manggawa ed pakayari na totoo ya andi-kabaliksan.—Isaias 40:15.
2 Sirin anggapoy panduaruwa a si Jehova so walaan na pakayari tan biskeg a manggawa ed saman so imbaga ton gawaen to. (Isaias 46:9, 10; 55:11) Nepeg tayon sisiaen sano ibabaga na mapropetikon salita to a sikatayo so manasingger ed anggaan na nigeter a panaon ya impalugar to ed totoon mankurang ed binubukor a dalan da. Ipapanengneng na awaran a say agawaan na totoo ed atooan a bilay tan bilay na ayayep, ontan met ed dalin a mismo, so makapabaing, sakey a mantsa ed talba. Sirin, si Jehova so sigpot a napatunong diad pamunas to ed sayan mantsa diad ando lan ando.—Oseas 4:1-3; Judas 14, 15.
3. Anto so ibabaga na propesiya na Biblia nipaakar ed asingger ya arapen?
3 Say nanenengneng yon nagagawa ed eksena na mundo so mabitar ya ebidensya a sayan sistema na bengabengatla so wala la ed unor a kabiangan “na kaunoran iran agew” a nipasakbay ed 2 Timoteo kapitulo 3. Agla mabayag et sayan sistema so paandien to la tan mekmeken to so ulo to, si Satanas a Diablo. Satan so tumboken na interamentin balon sistema na bengabengatla ed dalin, a kontrolen na mangatatawen a gobierno ya imbangat nen Jesus ed saray patumbok ton ipikasi sanen inkuanto: “Onsabi komon so panarian mo. Nagawa komon so linawam, unong ed tawen, ontan met ed dalin.”—Mateo 6:10; Daniel 2:44; Roma 16:20.
Say Prinsipyo na Panaliw
4. Panoy impangusar nen Jehova ed prinsipyo na pananaliw diad kadaanan ya Israel?
4 Saray gobierno na too so agmakayarin mamunas ed kasalanan, sakit, tan patey. Ingen, gawaen na gobierno na Dios so agnagawaan na totoo. Natalosan tayo no panon so kagawa na saya diad pangusisa ed saray impideneng nen Jehova ed katooan ton kadaanan ya Israel. Nensaman, inusar na Dios so prinsipyo na panaliw, odino panondon. Alimbawa, no pinmobre so sakey ya Israelita, nayarin ilako to so inkasikato bilang sakey ya aripen ed sakey ya aliwan-Israelita. Balet sikato so nayarin dondonen na maapit a kanayon to no walaan na magenap a presyon panaliw.—Levitico 25:47-49.
5, 6. (a) Panoy inkaepektibo na prinsipyo na pananaliw diad pangilukpos ed katooan diad atawir a kasalanan? (b) Kasin balang sakey so automatikon nabulos a manlapud kasalanan?
5 Mipadpara, intarya na Dios so panaliw ed katooan a manlapud panangaripen na kasalanan. Say presyo so nakaukolan a misimbangan ed saman so abalang. (Deuteronomio 19:21) Abalang nen Adan so inkayadyari, maandon atooan a bilay. Lapud anggapo ed saray makasalanan a totoo so makasimbang ed satan a bili, agda nayarian “a dondonen so anggan sakey ya agi.” (Salmo 49:7) Anggaman kuan, impasakbay na Biblia so isabi na sakey a makayari. Satan a sakey so apaneknekan a si Jesu-Kristo. Niparungtal a si Jesus so nambilay la ed tawen antis na inkatoo to. Balet say bilay to so niyalis ed panag-anakan nen Maria diad panamegley na pakayari nen Jehova. Diad saya sikato so nianak a bilang sakey a too. Balet lapud say Dios so Ama to, agto atawir so kasalanan a nanlupoy ed amin a katooan.—Mateo 1:18-21; Juan 1:1, 14; 1 Pedro 2:22.
6 Sirin, kinayarian nen Jesus so alenleneg a bengatlan misimbangan ed bili diad sakey ya ayadyarin atooan a bilay—sananey ya ayadyarin atooan a bilay. Balet aliwan singa si matungangan Adan, si Jesus so nansiansian matulok ed Dios. Tan sanen inyapay to so bilay to a para ed atooan a pamilya, satan so inawat nen Jehova a bilang manepeg ya impanaliw a presyo. (Galacia 1:4) Balet kasin kabaliksan na saya a balang sakey so automatikon nibulos la ed kasalanan tan makagamor na inkayadyari diad leksab na uley na Panarian? Andi, ta ibabaga na Juan 3:16: “Ontan la so impangaro na Dios ed mundo ya inter to so bogbogtong ya Anak to, ta pian siopaman a mangagamil na pananisia ed sikato so agkomon naderal noagta nawalaan na bilay ya andi-anggaan.” Dia lambengat ed pangawat na taryan impanaliw tan manggawa na bengatla ed satan a nasagmak tayo so kapasimbalo na laman tan kanonotan diad inkayadyari ed Paraiso.—Apocalipsis 21:4.
Edukasyon ed Balon Oksuy
7, 8. Anton posibilidad ed arapen a panag-aral so onsaral ed utek na too?
7 Say kanonotan so walaan na baleg a pakayarin manaral, anggan dia ed peles ya ag-ayadyarin kipapasen na too. Balet saya lambengat so melmelanting ed saman so nayarin naaralan diad Balon Oksuy, a ditan et say kasalanan so agla mangamper ed iyandar to. Diad The Brain Book inkuan na autor: “Diad dalem na dilin kauloan tayo et wadtan so sankakumplikadoan a sistema ed kabat a talba. Say pakayari tan inkatalyagum to so arawin palumbasan to so anggan anton kumpyuter a ginawa-na-too.” Inyarum to: “Mabetbet a nibabaga a 10 porsiento labat ed kanonotan tayo so nanausar lambengat. Saya, ompatnag natan, so alablabas a kalkulo. Angangko ta agtayo uusaren so anggan 1 a porsiento—ompan 0.1 porsiento odino kulang ni.”
8 Isipen pa sirin so nagawaan na utek tayo sano nagnap a nausar diad Balon Oksuy. Isipen so amin daray makapasagyat a bengatlan impasen nen Jehova ed sayan dalin ya aralen tayo, a singa saray ayayep, sirasira, tan tantanaman. Isipen, met, so panaral ed makapakelkelaw a talba diad saray binilbilyon a galaksi to. Isipen so amin a pakayarin mangabisado ed arte, musika, tan dakel niran arum a bengatla.
9. Anton nengneng na edukasyon so mangitarok na babaleg iran gungguna diad Balon Oksuy?
9 Wala ni so sananey a nengneng na edukasyon ed Balon Oksuy a mangitarok na sankabalgan a pankaabigan ed amin. Kuan nen Jesus: “Sikaran amin so bangatan nen Jehova.” (Juan 6:45) Saya so sankatageyan a sukat na edukasyon. Tan nitarya ed amin na saray uuleyan na Panarian na Dios, a pati saraman so makaliktar ed anggaan na sayan sistema na bengabengatla. (Apocalipsis 7:9, 14) Arum iran uuleyan na Panarian so asaglawi ed Juan 5:28 tan 29, ya inkuan nen Jesus: “Say oras so onsabi ya amin na saraman so wala ed pakanodnonotan a lubok so makadngel ed boses to tan ompaway ira.” Sayan kioli na binilbilyon a totoon inaatey—sigpot ya imposiblen nagawaan na totoo—kabaliksan ton say sankalaknaban a kimey na panangibangat so nagawa ed sikara.
10. Panon so pantultuloy na edukasyon ed Balon Oksuy?
10 Natan wala so dakel a manggugutgutan iran sistema na edukasyon. Balet diad Balon Oksuy, itarya na mangatatawen a gobierno na Dios so sakey a sankamundoan a sistema na edukasyon diad pangibangat ed totoo na katuaan nipaakar ed si Jehova diad nankakasakey a dalan. Kabiangan na saya et say pangibangat ed totoo nipaakar ed manepeg a siglaotan na totoo. Anggapo la so pangibangat diad pankinon ed rasa, nasyonalidad, odino talindeg ed sosyal. Noag ingen, naaralan na saray manaayam ed dalin ya aroen so balang sinansakey, anggan anto so dignidad to. Say ontan ya edukasyon so mansumpal met ed sankaabigan a kapasimbalo na saray personalidad a mangisindag na superyor iran kalidad nen Jehova.—Gawa 10:34, 35; Colosas 3:9-12.
11, 12. Panon so pakapanseguro tayo a say ontan ya edukasyon ed Balon Oksuy so ontalona ed gagala to?
11 Kasin say ontan ya edukasyon so peteg ya epektibo? Maseguro itayo ya ontan! Sakey a rason et si Jehova, ya agmantila, so mangibabaga a manggawa ed satan. (Tito 1:2) Nagkalalo ni, sayan nengneng na edukasyon so mankukurang lan epektibo natan! Si Jehova so walaan la na sankamundoan a managbangat a muyongan a mangibabangat ed saray nilaksalaksan totoo nipaakar ed gobiernon Panarian to tan saray nakakaukolan to. Saya so nagagawa lapud say uley na Panarian so onkukurang la nanlapulad inggapo “na kaunoran iran agew” nen 1914.
12 Nanlapulad saman a panaon say propesiya ed Mateo kapitulo 25 so nasusumpal. Ipapanengneng to a si Jesus so sinmabi la ed pakayari Panarian to legan a saray kakabusol na Dios so wadia ni ed dalin. Kuan na bersikulo 32: “Amin a nasyones so natipon ed arap to, tan pambibiiganen toray totoo ed balang sinansakey, a singa say sakey a pastol et ibiig toray karnero a manlapud saray kanding.” Sarayan malakarneron totoo so ibabangat la nen Jehova diad panamegley na ombubulaslas, nanengneng a muyongan to. Aapresyaen da so nanaaralan da, pankikimeyan dan pasimbaloen iray personalidad da a mitukoyan ed indengan na Dios. Tan say katuaan a sayan edukasyon so mangaapekta ed nilaksalaksan totoo ed pankaabiganan da la natan so sakey a seguradon panandaan a satan so nagawan mas nagkalalon malaknab diad Balon Oksuy na Dios.
Panangipaalagey na Paraiso
13. Anton baleg a kimey na panagpaalagey so nagawa ed silong na uley na Panarian?
13 Sananey a nengneng na uley ed silong na Panarian et say panggawa ed sayan dalin diad sakey a paraiso. Tan say Paraiso et agto isakup iray asedser iran nakukumog a kaabungan odino kairapan. Kaliktan na totoo so desentin kaabungan tan dalin ya ataneman na kakiewan, karosasan, tan tantanaman. Saraman so maliket a paibangat ed Dios so manggawa na ontan. Impasakbay na Isaias 65:21 tan 22: “Tan sikara so seguradon mangipaalagey na kaabungan tan panayaman da ra; tan sikara so seguradon mantanem na kaubasan tan mangan ed bunga ra. Aglara manpaalagey tan sananey so manayam; aglara mantanem tan sananey so mangan. . . . saray kimey na dilin lima na pinilik so nausar a nagnap.”
14, 15. Akin a makapanmatalek itayo a saray ariripen nen Jehova so makayarin mangipaalagey na sakey a paraiso?
14 Agpanduaruwaan so gawaen nen Jehova ed saray mabulos a kapusoan tan kalimaan na totoo to diad Balon Oksuy. Anggan natan say managpaalagey a mundo so mankelaw ed nagagawaan na saray Tasi nen Jehova diad panagpaalagey da, a singa say maples iran impaalagey a Kingdom Hall. Kayari na sakey ed saraya so nipaalagey ed Estados Unidos, inkuan na sakey ya editoryal na peryodiko: ‘Bengatlan mas mabli nen say sakey a paalagey so ginawa na saramay 2,000 boluntaryo. Inimanon maapit na saray papangulon sibiko so agawa nen imbeneg a Sabado tan Simba. Say entusiasmo, dedikasyon tan pilalek a mangabet ed sakey a kalat so nausar a tekep na makapakelaw a resulta. No saray lokal a grupo so makayari lambengat a mangusar ed saratan, anggan anton kalat—balanglan diad resikulo, pangamper ed krimen, odino ibulaslas na komunidad—so nayarin nadampot. Sakey ya ulop na saray komikimey so amaneknek a say pakayari so wala ed dalem na kamarerwa sano mankakasakey so komunidad. Ilaloan tayon say Kingdom Hall so pasen na sakey a subol na inspirasyon ed kongregasyon na saray Tastasi. Say kiwawala to so inspirasyon la ed sikatayon amin.’
15 Sayan inkamabulos tan abilidad na saray ariripen nen Jehova so nausar ed mas lalon babaleg a pankaabigan diad Balon Oksuy. Tan agaylan makapaliket so pamalaspas ed amin na saray agkalikaliktan a pasen tan sandian na saray mararakep a kaabungan tan kaliberliber! Agaylan makapnek so pakaamta a saray sagpot yo ed inagew-agew so mangitarok ed dalin a manasingger diad sankagloboan a paraiso!
Nankakasakey a Sankagloboan a Pamilya
16. Akin a saray manaayam ed Balon Oksuy so agbalot la nakigtot ed karawalan?
16 Nisay saray manaayam ed Balon Oksuy so makalikna ni na kakigtotan ed krimen, panggugulo, odino bakal. Kuan na Salmo 46:9: “Saray bakal so patundaen [na Dios] ya anggad saray kasampotan na dalin.” Say “Prinsipe na Kareenan” si Jesu-Kristo, so mangipaakseb na magnayon a kareenan ed mundo, lapud “diad inkadaakan na maprinsipen uley tan ed kareenan et anggapo so anggaan to.” (Isaias 9:6, 7) Diad kiwawala na tuan kareenan, tan ed interon atooan a pamilyan nibangat ed parehon atagey iran estandarte, amin so mankakasakey ed agnapultot a bedber na aro. Sirin, anggapo la ray manangapag a ketegan na nasyones.
17. Panon kalaknab la natan so kareenan tan pankakasakey ed saray totoo na Dios?
17 Kasin saray ontan a sipan so kugip lambengat? Andi, say kareenan tan pankakasakey so petepeteg la natan ed limog na saraman so matoor a sinmuko ed uley na Panarian! Saya so imanoen: “Masulok a duara tan kapalduan milyon a tastasi nen Jehova so nikayat ed interon dalin. Ingen, susumpalen da la so Isaias 2:4, a kuanto: “Tan pandayen da laray kampilan a pagmaliwen a dingding na lukoy tan saray gayang da a kalkalawit. Say nasyon so agla mangiyayag na kampilan a sumpad nasyon, tan aglara manaral na bakal ed anggan kapigan.” Saray Tastasi nen Jehova so agbalot manggagalan mamatey ed saray agagi ra, odino anggan siopa, ed anggan anton dalin. A singa imbaga na Il Corriere di Trieste a palapagan ed Italya: “Sikara so akaparaan a mangarap ed patey imbes a sumlangen da so manunan ganggan . . . AGKA MAMATEY!” Lapud pananumbok ed saray estandarte na Dios, saray Tasi nen Jehova so walaan na tuan kareenan tan pankakasakey, a satan so imposiblen nagawaan na sayan mundo. Tan say katuaan a nilaksalaksa ed sikara so manggagayaga ed sayan kipapasen ed utel na sayan atabek-na-gulon mundo so mamekder ed saman so nagawa sano say Panarian na Dios so mangontrol ed amin a kurang ed dalin.—Juan 13:34, 35; 1 Juan 3:10-12.
18, 19. Anto so arum ed saray gungguna ya onsabi ed saraman so manumbok ed atagey iran estandarte na Dios?
18 Niarum ed sayan internasyonal a kareenan tan pankakasakey, say pananumbok ed superyor ya estandarte na Dios so amawala na totoon maaro ed kakaabay da tan kaykayarian na kakaabay da. Sirin ‘ikiwas da so inkasikaran simamatua ed amin a bengatla.’ (Hebreos 13:18) Nipaakar ed saya, insulat na sakey a kolumnistan Pranses-Canadian, ed Le Journal de Montreal, nipaakar ed saray Tasi nen Jehova: “No sikara lambengat so totoo ed mundo, agtayo la nakaukolan ya ikandado o balewetan iray puerta tayo tan nisay mangyan na panagsiwan serena.”
19 Sarayan matoor ya uuleyan na gobierno na Dios so andian na problema ed krimen ed limog dan dili, bang saya so anggapo ed mundo. Ontan met, lapud sikara so manutumbok ed atagey ya estandarte na Biblia ed moral, sikara so agsinalot na saray makaalis a sakit ed sekso odino ed panagpaekal a sikara so kasmak ed anggan anton nasyon. Tan saray ariripen nen Jehova so mangitatandoro ed panangasawa diad aralem a respeto, a miduma ed malukak a panmoria na mundo ed areglo na panangasawa. Akin a napansiasiansia na saray Tasi nen Jehova so ontan iran estandarte? Lapud si Jehova so mangiwawanwan ed matoor iran managdayew to, tan “diad Dios et amin a bengatla so nayari.”—Mateo 19:26.
Mantitipon ed Tuan Panagdayew
20. Anto so sankabaliksan a pakurang ed modernon panaon?
20 Balanglan namoria na totoo odino andi, say sankagloboan a katitipon na saray malakarneron totoo ed muyongan nen Jehova so sankabaliksanan a kurang ed modernon panaon. Saya so kasumpalan na makatantandan propesiya ed Isaias 2:2, 3: “Tan nagawa ed unor a kabiangan na saray agew a say palandey na abung nen Jehova [say nipaatagey a tuan panagdayew ed sikato] so niletneg a malet ed labas na tuktok na palandey, tan seguradon nipaatagey ed tagey na saray pukdol; tan diad sikato so agosan na amin a nasyones. Tan dakel a totoo so onla tan kuan da: ‘Gala, sikayon totoo, tan ontatdang itayo ed palandey nen Jehova, . . . tan ibangat to itayo ed saray dalan to, tan manakar itayo ed saray basbas to.’”
21. Anto so nipaseseg ed saray masimpit-impanpuson totoo a gawaen?
21 Papasesegen mi so amin a masimpit ya impanpuson totoo a magmaliw a kabiangan na sayan makapaliket a kurang ed mundo a mamaarap ed tuan panagdayew tan diad matunong a gobierno. Panggayagaan iray bendisyon a wala la natan diad pililimog ed totoon nibabangat ed saray ganggan tan prinsipyo na Dios. Sitotoor ya onsuko ed uley na Panarian a magano lan onggapo a pagmaliwen to so sayan dalin a paraiso. Iteen yo so talek yo ed satan a Panarian tan aliwan diad saray gagala na sayan mundo, ta ibabaga na Salmo 127:1: “No aliwan si Jehova so mangipaalagey na abung, andi-kakanaan so pampaalagey na saray managpaalagey.” Onkiwas ed imbitasyon diad Salmo 66:5: “Galidia, sikayon totoo, tan nengnengen yo so gawagawa na Dios. Say pidedeneng to ed saray anak na totoo so makapataktakot.” Kanian onasingger ed Dios a mangarantiya ed sankaabigan a gobiernon para ed katooan, say gobierno a nagawaan to so agnagawaan na too, say gobierno a diad asingger lan tuloy ya arapen et sikato lambengat so natilak ed sayan dalin.
Panon So Iyebat Yo?
◻ Akin a maseguro itayon gawaen nen Jehova iray gagala to?
◻ Panon a say prinsipyo na panaliw so epektibo dia ed pakalukpos na sakey ed kasalanan?
◻ Anton baleg a kimey ed edukasyon tan panagpaalagey so nagawa ed Balon Oksuy?
◻ Anto so ebidensya natan a say kareenan, pankakasakey, tan aro so wala ed sankadalinan diad Balon Oksuy?
[Litrato ed pahina 15]
Diad silong na uley na Panarian, saray totoon maaro-ed-katuaan “so ibangat iran amin nen Jehova”
[Litrato ed pahina 17]
Say kareenan tan pankakasakey so petepeteg la ed limog na saraman so sinmuko ed gobiernon Panarian