Sakey a Balon Mundo Unong ed Sipan na Dios
SAY Biblia, a nisulat a Salitay Dios, so mangiiter ed sikatayo na ilalo sanen inkuan na satan ya: “Unong ed sipan to alagden tayo so saray tawen a balo tan dalin a balo, a sikara so pana-ayaman na katunongan.”—2 Pedro 3:13.
Anto so “saray tawen a balo”? Isisiglaot na Biblia so tawen ed pananguley. (Gawa 7:49) “Saray tawen a balo” et sakey a balon gobierno a manuley ed interon dalin. Balo itan lapud salatan na satan so peles a sistema na pananguley; balo met itan a nagawa diad pakasumpal na gagala na Dios. Satan imay Panarian ya imbangat nen Jesus ya ipikasi tayo. (Mateo 6:10) Lapud say Dios so Lapuan na satan tan sikatoy manaayam ed tawen, atawag itan a “panariay tawen.”—Mateo 7:21.
Anto so “dalin a balo”? Aliwa itan a balon planeta, lapud malinew ya ibabaga na Biblia a say dalin so panayaman ed ando lan ando. Say “dalin a balo” et sakey a balon sosyedad na too. Balo itan lapud mangangga iray marelmeng. (Uliran 2:21, 22) Amin sirin a manbilay ditan so mangigalang tan ontulok ed Manamalsa tan manbilay a mitunosan ed saray kakaukolanen to. (Salmo 22:27) Saray totoo ed amin a nasyon so iimbitaan ya amtaen da iratan a kakaukolanen to tan itunos day kabibilay da ed saratan natan. Kasin gagawaen yo la itan?
Diad balon mundo na Dios, amin so manrespeto ed pananguley To. Kasin papakiwasen kayo na panangaro ed Dios ya ontulok ed sikato? (1 Juan 5:3) Kasin napatnagan itan ed ayaman yo? diad trabaho odino diad eskuelaan? diad panagbilay yo?
Diad satan a balon mundo, say sosyedad na too so mankakasakey la ed panagdayew ed tuan Dios. Kasin dadayewen yo so Amalsa na tawen tan dalin? Kasin say panagdayew yo et talagan ikakasakey to kayo ed saray kapara yon managdayew ed amin a nasyon, amin a rasa, amin a lenguahe?—Salmo 86:9, 10; Isaias 2:2-4; Sofonias 3:9.
[Kahon ed pahina 17]
Say Dios a Mangisisipan ed Sarayan Bengatla
Sikatoy Amalsa ed literal a katawenan tan ed planetan Dalin. Sikato imay impakabat nen Jesu-Kristo bilang say “saksakey a tuan Dios.”—Juan 17:3.
Karaklan ed katooan so mangigagalang ed dirios a ginawa ran dili. Minilyon so ondadakmomo ed saray andiay-bilay ya imahen. Arum so mangiglogloria ed saray institusyon na too, materyalistiko iran pilosopiya, odino saray dilin pilalek da. Anggan saraman so mangibabagan manguusar ed Biblia so agbalot mangigagalang ed ngaran ya ipapabidbir na Biblia bilang say “[tuan] Dios.”—Deuteronomio 4:35.
Nipaakar ed inkasikato, onia so ibabaga na Manamalsa: “Siak si Jehova, satan so ngaran ko.” (Isaias 42:5, 8) Sayan ngaran so pinmatnag ed masulok a 7,000 danay ed Biblia diad orihinal iran lenguahe na satan. Imbangat nen Jesu-Kristo iray patumbok to a manpikasi: “Ama min wala ka ed tawen, Nagalang komon so ngaran mo.”—Mateo 6:9.
Antoray kalidades na tuan Dios? Deneskribe toy inkasikato bilang “mapangasi tan mapaaro, mapalna ya onsanok, tan daakan ed maaro ya abig na linawa tan katuaan” tan sakey ya agmangipuera ed kadusa na saraman so sigagagalan manumlang ed saray ganggan to. (Exodo 34:6, 7) Say awaran na pidedeneng to ed katooan so mamaneknek ed katuaan na satan a deskripsion.
Namparan say ngaran tan say irerepresenta na satan a ngaran so nepeg a napasanto, odino tratoen bilang masanto. Bilang Manamalsa tan Sankatalbaan a Soberano, sikatoy makanepegan a tuloken tan sigpot a dayewen tayo. Kasin gagawaen yon mismo iratan?
[Kahon/Litrato ed pahina 18]
Antoran Pananguman so Gawaen na “Saray Tawen a Balo tan Dalin a Balo”?
Magmaliw a Paraiso so dalin Lucas 23:43
Sakey a sankagloboan a sosyedad, Juan 13:35;
a saray totoo ed amin a nasyon, Apocalipsis 7:9, 10
amin a rasa, amin a lenguahe so
mankakasakey ed aro
Sankagloboan a kareenan, tuan Salmo 37:10, 11;
kaligenan parad amin Miqueas 4:3, 4
Makapaliket a kimey, Isaias 25:6; 65:17, 21-23
daakan atagano
Naandi lay sakit, ermen, Isaias 25:8;
ipapatey Apocalipsis 21:1, 4
Sakey a mundon nankakasakey Apocalipsis 15:3, 4
ed panagdayew ed tuan Dios
[Kahon/Saray litrato ed pahina 19]
Kasin Nagunggonaan Ka?
Agnayarian na Dios so mantila!—Tito 1:2.
Inyabawag nen Jehova: “[Say] salitak . . . sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangiyakaran ko ed sikato.”—Isaias 55:11.
Si Jehova so mamapalsa la na “tawen a balo tan dalin a balo.” Sayan mangatatawen a gobierno so onkukurang la. Niletneg la so pundasyon parad “dalin a balo.”
Kayarin niparungtal so pigaran makapakelkelaw a bengatla a gawaen na “tawen a balo tan dalin a balo” ed katooan, inaon na Apocalipsis so inkuan na Dios a mismo, say Sankatalbaan a Soberano: “Nia, siak gawaen ko a balo so saray amin a bengatla.” Ontan met, inkuan to: “Isulat mo; ta saraya a salita sikara so matoor tan matua.”—Apocalipsis 21:1, 5.
Say importantin tepet et, Kasin manggagawa itayo na nakaukolan iran pananguman ta pian napibilang itayon makana a magmaliw a kabiangan na satan a “dalin a balo” diad silong na “saray tawen a balo”?