Parte 1
Peteg Kasin Manatalima So Dios ed Sikatayo?
1, 2. Anto so itetepet na totoo nipaakar ed Dios, tan akin?
NO maminsan ed panbibilay yo, nayarin intepet yon: ‘No wala so Dios a peteg a manatalima ed sikatayo, akin ya inabuloyan to so ontanlan kairapan?’ Amin tayo so akaeksperiensia na kairapan odino akabatan so sakey a walaan na ontan.
2 Peteg, diad interon awaran saray totoo so nanlikna na ot-ot tan kaermenan lapud bakal, inkaruksa, krimen, ag-inkahustisya, inkaduka, sakit, tan say impatey na saray inadaro. Diad koma-20 siglo tayo lambengat, tinigway na bakabakal so masulok a 100 laksan totoo. Nilasus laksan arum ni so asugatan odino akabalang na saray ayaman tan kaykayarian. Dakerakel a makapataktakot a tuloy iran bengatla so nagagawa ed panaon tayo, a nansumpal ed baleg a kaermenan, pannangis, tan liknaan na inkaandi-ilalo ed biang na agnabilang a totoo.
3, 4. Panon so liknaan na dakel nipaakar ed pangiyaabuloy na Dios ed kairapan?
3 Arum so nagmaliw a dismayado tan manliknan no wala so sakey a Dios, sikato so agpeteg a manatalima ed sikatayo. Odino liknaen da ni ingen ya anggapo so Dios. Alimbawa, intepet na sakey a lakin nanirap manlapud panamasegsegang ed inka-tribu a sengegan na impatey na kakaaro tan pamilya ed Guerra Mundial I: “Iner so kawalaan na Dios sanen nakakaukolan mi?” Sananey, ya akaliktar ed nilaksan impamatey na saray Nazi nen Guerra Mundial II, so ontalan naermenan ed kairapan ya anengneng to, ya inkuanto: “No dildilan yo so pusok, samalan to kayo.”
4 Kanian, dakel a totoo so agmakatalos no akin a say maabig a Dios et mangiyaabuloy a nagawa iray mauges a bengatla. Susuppiaten da no kasin peteg a manatalima ed sikatayo odino kasin sikato so wala. Tan liknaen na dakel ed sikara a say kairapan et lawas kabiangan na kiwawala na too.
[Litrato ed pahina 2, 3]
Kasin asingger la so balon mundo a bulos manlapud irap?