Lakin Agtinmakot

NENGNENG mo yay lakin eelek-elekan da. Antam no siopa ya? Si Jeremias. Sikatoy kabkabat a propeta na Dios.

Sanen dineral nen Arin Josias iray idolo, tinuro nen Jehova si Jeremias a magmaliw ya propeta To. Balet, inisip nen Jeremias ya sikatoy uga-ugaw ni. Pero imbaga nen Jehova ya sikatoy tulongan to.

Binilin nen Jeremias iray Israelita ya tundaan day manggawa na mauges, imbaga to: ‘Aliwan tuan dios iray dadayewen na totoo.’ Balet mas labay na dakel ya Israelita ya dayewen iray idolo imbes ya say tuan Dios a si Jehova. Sanen imbaga nen Jeremias ya dusaen ira na Dios ta mauges ira, inelekan da labat.

Linmabas so panaon. Inatey si Josias, tan kayari na taloy bulan, nan-ari si anak ton Jehoiakim. Lanang ya ibabaga nen Jeremias ed totoo: ‘Naderal so Jerusalem no agkayo manguman.’ Kanian sikatoy siningkat na saray saserdote tan ineyagan da: ‘Napatey kad sayan ibabagam.’ Insan da imbagad saray prinsipe na Israel: ‘Nepeg ya pateyen si Jeremias ta mansasalitay laban ed syudad tayo.’

Anto natay gawaen nen Jeremias? Sikatoy agtinmakot! Imbaga tod sikara: ‘Imbaki ak nen Jehova pian ibaga iraya ed sikayo. No agkayo manguman, deralen nen Jehova so Jerusalem. Tan tandaan yo ya: No pateyen yo ak, pinatey yoy inosentin too.’

Agpinatey na saray prinsipe si Jeremias, balet siansia nin mauges iray Israelita. Ag-abayag, nilusob na ari na Babilonia a si Nabucodonosor so Jerusalem. Tan ginawa ton aripen iray Israelita. Dakdakel so inawit to ed Babilonia. Anto kasi naliknam no awiten ka na agmo kabat a too diad arawin lugar?