Manpapatambal Met Iray Tasi nen Jehova?

On, manpapatambal iray Tasi nen Jehova. Anggano aasikasoen mi laman mi pian agkami mansakit, no maminsan et ‘kaukolan mi met so doktor.’ (Lucas 5:31, Maung a Balita) Diad tua, singa say Kristiano nen inmunan siglo ya si Lucas, wala ray Tasi nen Jehova natan ya doktor met.​—Colosas 4:14.

Balet wala ray panagpatambal ya kontrad saray prinsipyo na Biblia kanian agmi iratan pipilien. Alimbawa, agkami manpapa-blood transfusion ta ibabawal na Biblia so pangusar na dala pian sustinien so laman. (Gawa 15:20) Ibabawal met na Biblia so panagpatambal ya walay espiritismo to.​—Galacia 5:19-21.

Dakel ed saray panagpatambal natan et agmet kontra ed saray prinsipyod Biblia. Kanian depende itan ed too no antoy pilien to. Ompan pilien na sakey a Tasi so espisipikon klase na panagpatambal, balet ag-itan awaten na arum a Tasi.​—Galacia 6:5.