Kasin Diad Israel Onggapo so Armagedon?​—Antoy Ibabaga na Biblia?

Ibabaga na Biblia ya say Armagedon et aliwan guerra ya nagawa diad sakey labat ya lugar. Imbes, guerra itan diad interon mundo ya say manlaban et amin ya gobierno na too tan say Dios.

• “Saraya et balikas ya impuyan na saray demonyo . . . tan oonla iraya ed saray arari na interon dalin, pian tiponen da ra ed guerra a nagawa ed baleg ya agew na Dios a Makapanyarin-amin. . . . Tinipon da ra ed pasen a tatawagen ed Hebreo ya Armagedon.”​—Apocalipsis 16:14, 16.

Say salitan “Armagedon” et nanlapud Hebreon salita ya Har Meghid·dohnʹ, ya say labay ton ibaga et “Palandey na Megido.” Say Megido et sakey ya syudad nensaman diad Israel. Atan so rason no akin ya wala ray manisia ya say Armagedon et nagawa kuno diad Israel. Pero no diad Megido odino diad arum nin lugar ed Middle East so pakagawaan na Armagedon, ag-onduga ditan iray “arari na interon dalin” tan saray sundalo da.

Insulat so libron Apocalipsis “panamegley na saray simbolo.” (Apocalipsis 1:1) Kanian say Armagedon et ag-ontutukoy ed sakey ya literal ya lugar, noagta kipapasen diad interon mundo ya no iner et mantitipon iray bansa ya onlaban ed gobierno na Dios.​—Apocalipsis 19:11-16, 19-21.