Nalmo Da Imay “Mabmablin Perlas”

Imbangat nen Jesus ya ekalen na Panarian na Dios so amin ya problema na totoo. (Mateo 6:10) Diad Mateo 13:44-46, angiter si Jesus na duaran ilustrasyon ya mangipapanengneng ya mabmabli so katuaan nipaakar ed Panarian na Dios:

• Sakey a toon mankikimey ed uma tan agto inilaloan ya makaromog na sakey ya akaamot ya kayamanan.

• Sakey ya ombiabiahen negosyante ya manaanap na mararakep ya perlas so akalmo na sakey a mabmablin perlas.

Inlako dan dua so amin ya kaykayarian da pian naala da itan ya kayamanan. Irerepresenta na duaran lalaki iray totoon mamapablin maong ed Panarian tan akaparaan ya mansakripisyo pian naala da iray bendisyon na satan. (Lucas 18:29, 30) Diad sayan video, nabantayan so eksperiensya na duaran totoo ya mipara ed saramay lalakin abitlad saray ilustrasyon nen Jesus.