Agawaan nen Hulda so Goal To

DIAD Indonesia, walay taloran sister ya manaayam ed melag ya isla ya say tawag et Sangir Besar. Pigaran taon lay apalabas, saniiba iran nankimey diad gilig na dayat. Diad sayan isla, kabkabat irayan agagi tayo ta makuli ran manpulong. Pero diad saman, duman kimey so ginawa ra.

Manaanap iray angkabaleg ya bato, insan da awiten ed gilig na dayat. Wala ray nanaala dan bato ya say kabaleg to et singa ra bola na soccer. No akarakel la ra, onyurong irad bangkitot insan da masoen iratan ya bato ya anggad magmaliw iratan ya singa labat kabaleg na iknol. Iyan da iratan ed timba, insan da uloren diad abung da ya patatdang so dalan. Ikarga da iratan ed saray sako. Insan da ilako ta diad lugar da et uusaren iratan ed panaggaway karsada.

Sakey ed sarayan agagi tayo et si Sister Hulda. Lapud situasyon to, mas dakel so panaon ton mantrabaho kompara ed samay duara. Dati, amin ya nanaalmo to et parad inagew-agew ya pankaukolan na pamilya to. Pero inaruman toy oras na pantrabaho to ta walay goal to. Labay toy makatipon ta pangarap toy makasaliw na tablet pian nausar toy JW Library^® app. Amta to ya makatulong itan ed ministeryo tan pam-personal study to.

Diad loob na sakey tan kapalduan bulan, inaruman nen Sister Hulda na duay oras so panmamaso toy bato kada kabuasan ya anggad akapano na sakey ya melag ya truck. Sa wakas, akatipon na isaliw toy tablet to.

Oniay kuan nen Hulda: “Makapakesaw so manmaso, onkelat so taklay mo. Pero nen gagamiten ko lay balon tablet ko diad ministeryo tan nen matmainomay ko lay manparaan ed aral, aminpinsan kon alingwanan so banal ko!” Maong labat kuno ta walay tablet to, lalo la nen kakkagapo na pandemic ta online ya amin so aral tan panagpulong. Maliket tayo parad si Sister Hulda ta agawaan toy goal to!