Usaren so Home Page na JW.ORG Diad Ministeryom

Nanengneng ed home page na website tayo iray artikulo tan video ya denisinyo pian naalay interes na saray aliwan Tasi nen Jehova ya walaan na dugan kipapasen na puso. (Gaw 13:48) Maslak et nanengneng ditan iray topic ya walad balita odino saray kaplesan ya iisipen tan pantotongtongan na totoo.

Panon mon nausar so home page na jw.org diad ministeryom?

• Regular mon lukasan so website. Imanoen no antoy kaplesan ya akakarga ditan, tan isip mo no panon mon nausar itan pian natulongan so sakey ya interesado. (Pian naalmom iray artikulo ya agano nin inrekomenda diad home page, i-click so “Nengnengen ni arum.”) No updated ka ed saray karga na website tayo, makatulong itan pian lanang ya balo iray ipresentam ed ministeryo.

• Usaren iray artikulo tan video ya nanengneng ed home page pian makapangigapo na tongtongan. Makatulong iya pian nawalaan tayoy ideya ed no antoy nayarin iisipen na totoo ed teritorya tayo.

• Ipanengneng so home page. Ipaimano iray espisipikon topic, tan ipanengneng ed katongtong mo no panon ton naalmo so arum nin impormasyon ed website tayo.

• I-share so link. Wala ray manaalangan ya mitongtong ed sikatayo diad personal, balet labay dan lukasan so website tayo. Kanian agka manaalangan ya mangipawit ed saray interesado na link na home page, odino sakey ya espisipikon artikulo o video ya nanengneng ditan.