BILAY NA KRISTIANO

Balon Feature na Midweek ya Aral

Onggapod Enero 2018, pantongtongan ed midweek ya aral so study notes tan media ya walad online ya study edition na New World Translation of the Holy Scriptures (nwtsty), anggano anggapo ni study edition ed lenguahe yo. Seguradon makatulong irayan impormasyon pian mas na-enjoy yoy pamparaan yod aral. Sankaimportantian ed amin, komon ta lapud saya et mas onapit kayod maaron Ama tayo, si Jehova!

STUDY NOTES

Saray impormasyon tungkol ed kultura, lugar, tan saray salita pian mas natalosan tayo ray bersikulo na Biblia.

Mateo 12:20

Makuykuyep a pabilo: Say kaslakan ya lamparaan ed abung nensaman et melag labat, gawad pitek, tan napnoy larak na olibo. Walay pabilo ton lino ya manepsep ed larak pian tuloytuloy so apoy. Say Griegon termino ya “makuykuyep a pabilo” et nayarin ontutukoy ed manasewek ya pabilo ya wala ni melag ya apoy to pero ngalngali la naerep. Impropesiya ed Isaias 42:3 so panangabagey nen Jesus; agton balot erepen so anggan sankamelagan lan ilalo na saray mapaabeba tan pakaskasin totoo.

Mateo 26:13

Tua: Diad Griego et a·menʹ, say transliterasyon na Hebreon ʼa·menʹ, ya mankabaliksay “ontan pa komon,” odino “segurado.” Mabetbet ya uusaren nen Jesus iyan salita antis ya mangibagay importantin punto, promisa, odino propesiya, pian idanet ya tua tan napanmatalkan so ibabaga to. Say impangusar nen Jesus ed salitan “tua,” odino amen ed onian paraan et agnabasa ed arum nin parte na Biblia o diad arum nin relihyoson literatura. Diad interon Ebanghelyo nen Juan, inusar nen Jesus so mamiduan “amen” pian mas idanet ya talagan tua tan napanmatalkan so ibabaga to.

MEDIA

Saray litrato, artwork, tan silent video tan animation ya mangipapanengneng ed nanduruman detalye ed Biblia.

Betfage, Palandey na Saray Olibo, tan Jerusalem

Sayan antikey ya video et ipanengneng toy rota paarap ed Jerusalem manlapud bukig, manlapud baryo na et-Tur ed modernon panaon—ya posiblin pareho ed samay Betfage ed Biblia—paonlad atagey iran pasen diad Palandey na Saray Olibo. Say Betania et walad bukig na Betfage diad bandad bukig na Palandey na Saray Olibo. No walad Jerusalem si Jesus tan saray disipulo to, mabetbet iran mansasanlabi ed Betania, ya natan et tatawagen ya baley na el-ʽAzariyeh (El ʽEizariya), salitan Arabic ya mankabaliksan na “Say Lugar nen Lazaro.” Seguradon ontutuloy si Jesus diad abung di Marta, Maria, tan Lazaro. (Mat 21:17; Mar 11:11; Luc 21:37; Jn 11:1) No onlad Jerusalem si Jesus manlapud abung da, nayarin say rota to et singa sayay walad video. Nen Nisan 9, 33 C.E., nen linmugan si Jesus ed kilaw ya asno ya dinmalan ed Palandey na Saray Olibo paonlad Jerusalem, sikatoy nanlapud Betfage, ya dinmalan ed karsada paarap ed Jerusalem.

Karsada manlapud Betania paonlad Betfage
Betfage
Palandey na Saray Olibo
Lawak na Kidron
Kawalaan na Templo

Pasak ed Pukel na Mukor

Nanengneng ed sayan litrato so replica na pukel na mukor na too ya pinalpalan na balatyang ya pasak ya 11.5 sentimetro (4.5 pulgada) so karukey to. Say orihinal ya artifact na pukel et aromog nen 1968, legan ya mankokotkot iray arkeologo diad amianen na Jerusalem, tan satan ya artifact et nen panaon ni na saray Romano. Ebidensya itan ya saray Romano et ipapasak dad poste iray papateyen da. Nayarin sayan pasak et pareho ed inusar na saray Romanon sundalo nen impasak dad poste si Jesu-Kristo. Sayan artifact et nalmod baton pananginan ya pangikakargaan na saray amagan pukel na inatey no abulok lay laman to. Ipapanengneng na saya ya anggan saray impasak ed poste et nayarin iponpon.—Mat 27:35.