Sanlasus Taon a Pangiyaabawag ed Panarian!

1. Antoy impaseseg ya gawaen na totoo nen Jehova diad apalabas a ngalngali sanlasus taon?

¹ “Nia, say Ari et manuuley la! Sikayo ray manangiyabawag to. Kanian iyabawag, iyabawag, iyabawag so Ari tan say panarian to.” Diad sarayan makapakiwas ya imbaga nen Brother Rutherford a ngalngali sanlasus taon lay apalabas, apaseseg iray totoo nen Jehova ya iyabawag so mensahe na Panarian anggad ararawin pasen. Tan ontan so ginawa tayo! Singa saray Kristiano nensaman, nipulong tayo lay maong a balita na Panarian “ed amin a pinalsa diad silong na tawen.” (Col. 1:23) No pawilen tayoy apalabas a sanlasus taon, anto la ray agawaan tayo pian niyabawag so Panarian na Dios? Panon tayon tuloytuloy a niyabawag itan legan a manasingger tayod koma 100 ya anibersaryo na inkiletneg na Panarian?

2. Panon ya ipapakabat na literatura tayo so Panarian na Dios?

² Diad Apalabas: Pigaran dekada lan ipapakabat na saray literatura tayo so Panarian na Dios. Manlapu la nen 1939, say ngaran na manunan magasin tayo et: Say Panag-bantayan Mangipapalapag na Panarian nen Jehova. Mabetbet ya ipapaliwawa na sayan magasin so Panarian tan no antoy gawaen na satan. Ipapaliwawa met na magasin ya Onliing! ya say Panarian na Dios labat so ilalo na totoo. Kanian duga labat ya sayan dua so magasin ya sankalaknaban ya ipapatalos tan ibubunog ed interon mundo natan!​—Apo. 14:6.

3. Anto ray pigaran paraan ya inusar tayo pian niyabawag so Panarian?

³ Saray totoo nen Jehova et akapangusar la na nanduruman paraan pian iyabawag so Panarian. Nensaman, angusar tayo na saray de-trumpan luluganan, panangibrodkas ed radyo, tan saray nabitbit ya ponograpo. Saratan ya paraan et tinmulong ed sikatayon pinsanan a niyabawag so maong a balita ed dakel a totoo nen panaon ya daiset ni ray manangiyabawag na Panarian. (Sal. 19:4) Diad agano ni ran taon, angi-publish tayo na saray impormasyon diad jw.org kanian niyabawag so Panarian ed minilyon a totoo​—kaiba la ra may manaayam ed saray bansan pepegetan so kimey tayo.

4. Anto ran espisyal a paraan so uusaren tayo?

⁴ Angusar met iray totoo nen Jehova na espisyal iran paraan pian niyabawag so mensahe na Panarian. Singa bilang, manlapu lad kapegleyay 1990’s et pinalaknab tayoy panagpulong ed kaabungan diad impanpulong tayod saray parke, paradaan, tan diad saray pasen na negosyo. Agano tayo nin inyuksoy so espisyal a panagpulong ed matoo iran syudad diad interon mundo. Ontan met, dakel iray kongregasyon ya mibibiang ed panagpulong ed publiko diad teritorya da ya uusaren iray nandalig ya panagdispleyan tan lamisaan ya asingger ed saray pasen a dakel so ondadalan ya totoo. Siempre, siansia nin say panagpulong ed kaabungan so manunan paraan na pangipupulong tayod Panarian.​—Gawa 20:20.

5. Anto ray pankanawnawa na dakel ed sikatayo diad balon service year?

⁵ Diad Arapen: Kagapo na balon service year no Setyembre, dakel so onggapon man-regular payunir. Kasin ontan met so gawaen mo? No andi, sarag mo kasi man-auxiliary payunir ya sagpaminsan? Balanglan makapanpayunir ka odino andi, seguradon bendisyonan ka nen Jehova ed antokaman a sakripisyom pian sigpot kan makapibiang ed pangiyabawag na Panarian.​—Mal. 3:10.

6. Akin et espisyal a bulan so Oktubre 2014?

⁶ Say bulan na Oktubre 2014 so koma 100 ya anibersaryo na inkiletneg na Panarian. Dugaruga ya say publikon edisyon na The Watchtower ed satan a bulan et akapokus ed Panarian na Dios. Komon ta gawaen tayoy anggaay nayarian tayon iyopresi iyan isyu ed dakel a totoo anggad posible. Legan tayon tatalaranan so nagawad arapen, komon ta itultuloy na balang sakey ed sikatayo ya ‘iyabawag so maong a balita nipaakar ed Panarian na Dios.’​—Gawa 8:12.