Serye ya Makatulong ed Ministeryo Tayo
1. Anto so duaran gagala na seryen “Tongtongan Nipaakar ed Saray Topic Diad Biblia”?
1 Wala ray isyu na publikon edisyon na Say Panag-bantayan ya pakabasaan ed seryen “Tongtongan Nipaakar ed Saray Topic Diad Biblia.” Duara so gagala na sayan serye—pian ipresenta iray bangat na Biblia diad makapainteres ya paraan tan ipanengneng no panon so mataktikan pankatunongan ed nanduruman topic. (1 Ped. 3:15) Panon tayon usaren irayan artikulo?
2. Panon tayon nausar iyan serye diad ministeryo tayo?
2 Usaren ed Ministeryo: Nayarin mangisinop kay ekstran kopya na isyu na Say Panag-bantayan ya pakabasaan na sarayan artikulo. No walay unabung, interesado, odino iyaaralan moy Biblia ya mantepet odino dumay sisiaen to ed sakey a topic ya walad sarayan artikulo, ikdan mo na kopya tan pantongtongan yo itan. No anggapoy kopyam ed satan, sarag mon i-download diad jw.org.
3. Panon tayon itongtong ed unabung irayan artikulo?
3 Panon yon itongtong irayan artikulo? Say gagawaen na arum ya agagi et ipabasa day dialogue na unabung ed katongtong da, tan sikaray manbasa ed dialogue na Tasi. Epektibo iyan paraan ta tulongan toy indibidual ya usisaen iray sisiaen tayo diad paraan ya agpansengegan na debati.—Deu. 32:2.
4. Panon tayon nausar irayan artikulo pian ipasal so sarili tayo?
4 Ipasal Moy Sarilim tan say Arum: Legan mon babasaen irayan artikulo, tandaan mo ray inusar ya teksto, ilustrasyon, tan say paraan na panagkatunongan. Imanom met so style na impansulat. Insan salim ya aligen itan diad ministeryom. (Uli. 1:5; 9:9) Oniay komento na sakey ya sister, “No basaen mo irayan artikulo, singa ka makakaaral ed ‘marundunong’ a payunir ya amta ton lanang no antoy dugan ebat!”
5. Panon tayon natulongan iray iyaaralan tayo ya manparaan parad ministeryo?
5 Nausar mo met irayan artikulo sano tutulongan moy iyaaralan mon manparaan parad ministeryo. Basa yon dua so artikulo, ya kunwari et sikato may manangipalapag. Diad onian paraan, nipraktis moy iyaaralan mo na Biblia no panon ton mataktikan nipaliwawa so sisiaen to. (Col. 4:6) On, sarayan artikulo et sakey ed saray dakel a paraan ya tutulongan itayo nen Jehova pian ‘sigpot tayon nasumpal’ so ministeryo tayo.—2 Tim. 4:5.