Mas Dakel so Pankanawnawan Nirayew si Jehova
1. Anto so balon uksoyan ya ontulong ed sikatayo pian ‘masimoon ya nirayew si Jehova’?
1 Nen Marso, ginmapo so balon uksoyan parad saray auxiliary payunir—sikaray naikdan na pankanawnawan aboten so 30 ya oras kada Marso, Abril, tan diad bulan ya bisita na manangasikasoy sirkito. No pinmetek ed duaran bulan so bisita na manangasikasoy sirkito, nayarin mamili iray manangipalapag no dinan ed saratan ya bulan so pan-auxiliary payunir da. Nayarin atendian na amin ya auxiliary payunir so interon miting parad saray regular tan espisyal payunir. Kanian no agtayo nasarag ya aboten so 50 ya oras balet sarag tayo so 30 ya oras, siansia nin makapan-auxiliary payunir tayo na anggad mamipat ed sakey taon tan ‘masimoon ya nirayew si Jehova’!—Sal. 109:30, NW; 119:171.
2. Antoy pankanawnawa na saray auxiliary payunir legay bisita na manangasikasoy sirkito?
2 Legay Bisita na Manangasikaso na Sirkito: Natan, mas dakel lay makapan-auxiliary payunir diad bisita na manangasikasoy sirkito tan makapanpapasesegan legan ya mikikimey ed sikato diad ministeryo. (Roma 1:11, 12) Nayarin dakel ed saray auxiliary payunir so man-day off ed satan ya sakey simba pian makapikimeyan ed manangasikaso na sirkito. Saramay mantratrabahod Lunes anggad Biernes et sarag dan kerewen ya mikimey ed sikato diad Sabado o Simba. Niarum ni, seguradon napaseseg iray auxiliary payunir diad iyatendi rad miting na saray regular tan espisyal payunir!
3. Akin et sankaabigan so Marso tan Abril pian man-auxiliary payunir?
3 Legay Marso tan Abril: Saramay akapan-auxiliary payunir ya sakey bulan legay panaon na Memoryal tan angabet na 30 ya oras et sarag da la natan ya doblien so “bagat na panangidayew” da! (Heb. 13:15) Sankaabigan so Marso tan Abril pian napalaknab so ministeryo tayo bilang auxiliary payunir. Kada taon legan na saratan ya bulan, makakapibiang tayod makapaliket a kampanyan pangimbita ed Memoryal. Niarum ni, lapud napapalaknab tayoy ministeryo tayo legay panaon na Memoryal, mas dakel so nakakaulop tayon agagi. Kayari Memoryal, papawilen tayo ray inmatendi pian imbitaan lamet irad espisyal a paliwawa. Kasin pakikiwasen ka na pusom ya samboten iyan kaaruman a pankanawnawa pian makapan-auxiliary payunir ka?—Luc. 6:45.