Mabulos Ka Kasin Man-adjust?
1. Lapud manguuman so kipapasen ed mundo, anto ray kaukolan tayon i-adjust?
1 Ibabaga na 1 Corinto 7:31 ya “say nanenengneng tayo natan ed sayan mundo et manguuman.” Lapud satan, kaukolan ya panapanaon et i-adjust tayoy paraan na panagpulong, eskedyul, tan presentasyon tayo. Mabulos ka kasin man-adjust?
2. Akin a kaukolan tayoy man-adjust pian makapibansag ed organisasyon nen Jehova?
2 Paraan na Panagpulong Mo: Manlapu la nensaman, saray Kristiano et mainomay ya onadapta. Nen inmunan imbaki nen Jesus iray disipulo to, binilin to ran agmangaawit na naakan odino kuarta. (Mat. 10:9, 10) Balet ag-abayag, inuman toy bilin to pian iparaan iray babangatan tod panamasegsegang tan ed ilaknab na panagpulong a kimey diad arum ni ran teritorya. (Luc. 22:36) Diad apalabas ya siglo, angusar na nanduruman paraan na panagpulong so organisasyon nen Jehova base ed no antoy nakaukolan. Singa bilang, angusar ira na saray plakard, radio broadcast, tan de-trumpan luluganan. Natan, lapud maslak ed saray totoo et matalag ya nabanaan ed abung da, ipapaseseg ed sikatayon iyarum ed panagkabkaabungan so publiko tan impormal ya panagpulong. Ipapaseseg met ed sikatayo so pankabkaabungan ed bandad ngarem pian nasabi iray totoon sanagew ya mantratrabaho. Legan ya uumanen nen Jehova so direksion na mangatatawen ya karwahe to, kasin makakapibansag itayo?—Eze. 1:20, 21.
3. Panon ya makatulong so pan-adjust pian mas epektibo tayod teritorya tayo?
3 Presentasyon Mo: Antoy pampapagaan na totoo ed lugar yo? Panagbilay? Pamilya? Krimen? Makatulong no amta tayo ray problema tan situasyon na totood teritorya tayo pian makapanparaan na matukoy ya presentasyon. (1 Cor. 9:20-23) No walay ibaga na katongtong tayo, imbes ya basta labat ebatan insan ituloy so imparaan ya presentasyon, mas maabig no man-adjust tayo tan pantongtongan so pampapagaan to.
4. Akin ya importantin ag-ipaleen so pan-adjust?
4 Asingger lan mangangga so “nanenengneng tayo natan,” tan onggapo lay baleg ya irap. “Apatikeyan lay akeran panaon.” (1 Cor. 7:29) Kanian, importantin ag-ipaleen so pan-adjust pian dakel so nagawaan tayo ed nakekeran antiktikey lan panaon!