“Say Karunongan et Napaneknekan a Matunong Diad Panamegley na Saray Gawa na Satan”
1. Anto so panmoria na arum ed kimey tayo?
1 Panapanaon itayon makakaabet na negatibon reaksion manlapud saray pupulongan tayo ya agmikabat ed kimey tayo odino akaawat na lingon impormasyon nipaakar ed saray Tasi nen Jehova. Nayarin say panmoria ra et naimpluensiaan na saray agsuston report na media. Diad arum a lugar et ikokonsidera da itayon “mapeligron sekta.” Anto so nepeg a reaksion tayo sano nipaarap itayo ed ontan iran managbalaw?
2. Anto so ontulong ed sikatayo pian napaliisay pakadismaya sano walay mamabalaw ed sikatayo?
2 Pansiansiaen so Positibon Panmoria: Nen inmunan siglo, mabetbet ya agnatatalosan tan susumpaen na saray totoo si Jesus tan saray arum ya ariripen nen Jehova. (Gawa 28:22) Balet ta agda inabuloyan so kritisismo a sengegay pangibaing da ed ministeryo ra. Inkuan nen Jesus: “Say karunongan et napaneknekan a matunong diad panamegley na saray gawa na satan.” (Mat. 11:18, 19) Intultuloy to a ginawa so linawa na Ama to tekep na seseg, ta sikatoy matalek a naamtaan met lanlamang na saramay manaanap na katuaan so kablian na maong a balita. Napaliisan tayo so pakadismaya no nodnonoten tayo a naeksperiensya na mismon Anak na Dios so ontan a panagtrato.
3. Akin et aliwa lan balo ed sikatayo iray negatibon report tan isusumpa?
3 Sinalambit nen Jesus a busolen na mundo iray papatumbok to no panon a sikatoy binusol da. (Juan 15:18-20) Kanian, aliwa lan balo ed sikatayo iray negatibon report tan isusumpa a nagagawa natan. Diad tua, kaukolan tayon ilaloan so lalon ikayat na saratan legan ya onaasingger so kasampotan na kaunoran iran agew tan legan a mas onsasanok si Satanas. (Apo. 12:12) Maliket itayo ed sarayan nagagawa lapud paneknek iraya a nauupot lay panaon na sistema nen Satanas.
4. Sano negatiboy reaksion na totoo ed awit tayon maong a balita, panoy nepeg ya ikiwas tayo?
4 Onebat Tekep na Kaabigan: Sano makaabet itayoy negatibon reaksion, nakaukolan a lawas itayon onebat tekep na kaabigan tan inkarespeto. (Uli. 15:1; Col. 4:5, 6) No iyabuloy na sirkumstansya, nayarian tayon ipaliwawa ed unabung a dakerakel so lingon impormasyon nipaakar ed saray Tasi nen Jehova odino itepet tayo’d sikato no akin ya ontan so panmoria to. Say marespeton ebat tayo so nayarin mamakiwas ed sikaton mantepet no kasin dugay nadngelan to nipaakar ed saray Tasi nen Jehova tan ompan ondengel lamet ed onsublay ya ibisita na saray Tasi. Balet no talagan manpapasnok so unabung, mas maabig no marespeto tayo lan manpatanir. Makaseguro itayo ya antokaman so panmoria ed sikatayo na arum, papablien nen Jehova so ministeryo tayo.—Isa. 52:7.