Mangganat ed Panagpulong!
1. Anton bilin nen Pablo so nepeg tayon imanoen diad panaon tayo?
1 “Ipulong mo so salita, maganat mon gawaen itan.” (2 Tim. 4:2) Akin et importante iyan bilin nen Pablo diad panaon tayo? Antoy epekto na saya ed bilay tayo tan ed bilay na arum?
2. Akin et maseet tayon aanapen iramay agni akadngel ed maong a balita?
2 Bilay so Nalalanor: Minilyon ed sankamundoan so agni akadngel ed maong a balitan makapangitonton ed kilalaban. (Roma 10:13-15; 1 Tim. 4:16) Dakel nin siansiay naroromog a matuan impanpuson totoo anggan diad saray teritoryan mabetbet a nakimeyan. Uman-umanen tayo sirin so agew tan oras na pampulong tayo, diad ontan et nanduruman totoo so nakatongtong tayo. No maseet tayon anapen iray matuan impanpuso, malinis so konsiensia tayo tan ag-itayo mankasalanan ed dala.—Gawa 20:26.
3. Panon tayon naseguro ya anggapoy sasayangen tayon oras diad ministeryo?
3 Anggano pinasegsegang iray Kristiano nen inmunan siglo, siansia nin ‘pinano da na bangat da so Jerusalem.’ (Gawa 5:28) Kasin ontan met so determinasyon tayon “sigpot a mantasi?” (Gawa 10:42) Diad ministeryo, kasin seseguroen tayon anggapoy sasayangen tayon oras? Alimbawa, no bilang ta kaukolan tayon alagaren iray kaiba tayo, kasin aasinggeran tan kakatongtongen tayo iray ondadalan?
4. Panon ya ontulong so pampulong tekep na inkaganatan pian mantultuloy itayon manbantay?
4 Ontulong Pian Lalon Manalerto: Manasingger la so anggaan na sayan sistema na bengabengatla, kanian nepeg a mansiansia itayon alerto, a mantultuloy a manbantay. (1 Tes. 5:1-6) No mabetbet tayon ipulong so ilalo na Panarian, napaliisan tayoy nabelatan ed sayan sistema na bengabengatla. (Luc. 21:34-36) Tan sano lawas tayon “sankanonot” so agew nen Jehova, napakiwas itayon nagkalalon mibiang ed sayan manangiliktar a kimey.—2 Ped. 3:11, 12.
5. Panon a say panagrespeto ed bilay so mamakiwas ed sikatayo diad ministeryo?
5 No manpulong itayo tekep na inkaganatan, ipapatnag tayon mipara so panmoria tayo ed panmoria nen Jehova ed bilay: “Agto labay a naderal so siopaman noagta labay to a makapambabawi so amin.” (2 Ped. 3:9; Eze. 33:11) Komon ta determinado itayon anggad posible et pulongan so amin ed teritorya tayo, diad kirayewan nen Jehova!—Sal. 109:30.