Kasin Akaparaan Ka ed Impormal a Panagpulong?

1. Anton alimbawa so mangipapanengneng ya epektibo so impormal a panagpulong?

¹ Talagan epektibo so impormal a panagpulong. Nabasa tayo ed Biblia so dakel ya alimbawa na impormal a panagpulong a walaan na maabig iran resulta. (Juan 4:7-15) Anto so kaukolan tayon gawaen pian makapanparaan tayo ed sayan klase na panagpulong?

2. Panon a makatulong so desentin itsura tayo pian makapanpulong?

² Panangawes tan Panag-ayos: No naynay a masimpit so panangawes tan mauksoy so panag-ayos tayo, agtayo nababaingan a manginabang na pananisia tayo ed arum. (1 Tim. 2:9, 10) No liknaen tayon agmatukoy so kawes tayo, medyo nababaingan itayon manpulong. Balet no malinis tan presentable so itsura tayo, ompan tepetan da tayo ni ingen no akin ya ontan so sulong tayo. Singa bilang, walay sanasawan Tasi a desente so panangawes da. Sanen sikara so manbiabiahe, akaabay da so sakey a Muslim. Lapud naimano na laki so desentin itsura ra, tinepet to no Kristiano ira. Nanresulta iya ed taloran oras ya impantongtong nipaakar ed Biblia.

3. Panon kayon akapangigapo na tongtongan diad impangalig ed ehemplo nen Jesus?

³ Panangigapoy Tongtongan: Sanen nabet nen Jesus so Samaritanan bii diad abay na bobon nen Jacob, inggapo toy tongtongan da panamegley labat na inkerew toy danum a nainum. Ontan met, nigapo tayo so tongtongan diad pangibano odino pangibaga na sakey a simplin tepet. Anggaman no maminsan et medyo nababaingan itayo, makapanpakpel tayon mangigapo na tongtongan no manilalo itayo ed tulong ya ipapagamor nen Jehova.​—1 Tes. 2:2.

4. Panon itayon makapanparaan pian makapanpulong na impormal?

⁴ Anamoten Iray Pankanawnawa: Dakel a pankanawnawa so nalmoan na saray agagi pian makapanpulong na impormal. Nonot yo met so kipapasen yo, pati saray totoon nanaabet yo ed kada agew. Mangawit kayo na saray matukoy a literatura tan melag a Biblia. Imanoen yo iray totoo ed kaliberliber yo tan mangipanengneng kayoy interes ed sikara. No paparaanan yo la iray kipapasen a nayarin naabet yo ed kada agew, lawas kayon akaparaan a manpulong.​—Fil. 1:12-14; 1 Ped. 3:15.

5. Akin ya agtayo kaukolan a leglemewen so impormal a panagpulong?

⁵ Walaan itayo na duaran importantin rason pian anamoten so kada pankanawnawan makapanpulong na impormal, salanti, say panangaro tayo ed Dios tan panangaro ed saray kakaabay tayo. (Mat. 22:37-39) Lapud inkaganatan so kimey tayo, agkaukolan a leglemewen so impormal a panagpulong. Nepeg ya anamoten tayo so amin a pankanawnawan ninabang ed arum so maong a balita na Panarian legan a wala ni panaon.​—Roma 10:13, 14; 2 Tim. 4:2.