Panliliketan na Saray Payunir so Mayaman a Bendisyon
1. Antoy amakiwas ed dakel a manpayunir?
1 Nen imbeneg a taon, walay aberids a masulok a sakey milyon a manangipalapag a nan-auxiliary odino nan-regular payunir ed sankamundoan. Akin et nampayunir ira? Lapud “say oras na pangukom [na Dios] sinmabi la.” Anggapo lay mas maganat a kimey natan nen say pangiyabawag ed “agmanganggan maong a balita.”—Apo. 14:6, 7.
2. Antoy akatulong ed dakel pian makapanpayunir?
2 No Panoy Pampayunir: Lapud “say panaon apatikeyan la,” panggugunaetan na saray payunir a pasimplien so panagbilay da. (1 Cor. 7:29, 31) Mangigimper ira ta pian nabawasan so panaon ya usaren da a mantrabaho. (Mat. 6:19-21) Lapud panagsakripisyo tan panagmatalek ed si Jehova, dakel so akapanpayunir. Kasin makapanpayunir ka? Akin ya agtepetan iray matalonan payunir no panon dan agawaan itan? Miulop ed sikara diad ministeryo tan naliknam met so liket da. Pantongtongan tayo so pigaran bendisyon a panliliketan na saray dakel a payunir.
3-5. Antoran bendisyon so panggagayagaan na saray payunir?
3 Saray Bendisyon tan Gayaga: Onia so inkomento na sakey a kalangweran a payunir: “Talagan sakey a bendisyon so pakasarag a nausar so katuaan na Salita na Dios ed dugan paraan. Sano mankabkaabungan ak natan, amtak la iray teksto ya usaren ko ed kada nakatongtong ko.”—2 Tim. 2:15.
4 Makatulong met so panagpayunir ed saray kalangweran pian naaralan day pangiyeskedyul ed panaon da, pambadyet ed kuarta ra, tan naaralan da met so mibagay ed saray totoo. Apaaligwas na dakel so inkamanonot da ed espiritual bilang resulta na impanpayunir da.—Efe. 4:13.
5 Nayarin say sankabalgan a bendisyon ed panagpayunir et say lalon iyapit tayo ed si Jehova. Inkuan na sakey ya agin bii a walaay pigaran baleg a problema: “Say maapit a relasyon ko ed si Jehova a resulta na pampapayunir ko so tinmulong ed siak pian natalonaan iratan a problemak. Akatulong ed siak so panagpayunir a lalon mansakripisyo.”—Gawa 20:35.
6. Akin a sankaabigan a panaon so Setyembre pian nonoten so pampayunir?
6 Kasin Nigapom so Manpayunir ed Setyembre? Maabig ya ikonsidera so igapo bilang regular payunir ed kagapo na balon serbisyon taon. Asalim ta lay nan-auxiliary payunir a mankaukolan na 50 oras ed sakey bulan? Kasin naaruman mo ni na 20 oras ed sakey bulan pian magmaliw kan regular payunir? Kasin dati kan payunir, balet ta akatunda lapud pigaran problema? Kasin iyabuloy la na saray sirkumstansyam natan pian onggapo ka lamet ed Setyembre? Amin so pasesegen mi ya aralen iyan maong tan, no posible, et ‘anamoten’ so panaon manlapud arum a kimey tan usaren ed pampayunir legan na 2010 a serbisyon taon!—Efe. 5:16.