Anapen Iray Makana
1. Panon tayon ipanengneng so apresasyon tayo ed pribilehyo a manlingkor diad ministeryo?
1 Legan na ministeryo nen Jesus, sikatoy linma ed ararawi pian iter so makaligliwan maong a balita ed saray mauyamo. (Isa. 61:1, 2) Bilang ibabaki tan mensahero a kasandi nen Kristo, walaan itayo natan na alay abig a pribilehyo a mangalig ed sikato diad maanos tan sigpot a pananap ed saray makana diad teritorya tayo.—Mat. 10:11; 2 Cor. 5:20.
2. Akin a nibaga tayon mainomay ya onadapta si Pablo, tan antoray resulta?
2 Mainomay ya Onadapta: Niyugali nen apostol Pablo so onla ya unona ed sinagoga pian pulongan iray Judio tan proselitas. (Gawa 14:1) Diad Filipos, sikato tan si Silas so nananap ed saray totoon ‘inisip dan walad pasen na panagpikasian.’ Sikaray nampulong ed grupo na bibii, tan sakey ed sikara et si Lidia, ya angawat a tampol ed katuaan.—Gawa 16:12-15.
3. Antoran serbisyo so nayarin panggayagaan tayo likud ed pampulong diad kabkaabungan?
3 Likud ed panagkabkaabungan yo, kasin makapanpulong kayo met ed saray totoo a walad istasyon na luluganan, parki, diad saray opisina, diad dadalanan na totoo, pasen na negosyo, tan diad saray shopping center ed teritorya yo? Nayarin makapanpulong kayo ed saray subdivision tan apartment a guardyado diad panamegley na sulat tan itawag ed telepono. No maobserba tan mainomay kayon onadapta ed nanduruman situasyon ed teritorya yo et nawalaan kayoy ‘daakan a kimey ed Katawan.’—1 Cor. 15:58.
4. Antoray opsyon tayo no melag so teritorya na kongregasyon tayo?
4 Dakel a manangipalapag so walaan na pankanawnawan mamalaknab ed ministeryo ra diad inyalis da ed sananey a kongregasyon, balanglan diad kawalaan dan bansa odino diad sananey a bansa. Nanaral so arum na sananey a lenguahe pian napulongan iray totoon nanlapud arum a bansa.
5. Antoy pangipasen tayo ed panaon a kawalaan tayo la, tan antoy determinado tayon gawaen?
5 Nepeg a lawas tayon tandaan a say teritorya et say interon mundo. (Mat. 9:37; 13:38) Lapud amta tayon asingsingger la so anggaan na sayan mauges a sistema na bengabengatla, nepeg a seryoson nonoten na balang sakey so kipapasen, talento, pankanawnawa, tan saray posibilidad to a mamadaak ed ministeryo to. Papaseguroan itayo nen Jehova a no iyuna tayo so intereses na Panarian, bendisyonan to so masimoon a sagpot tayo pian palaknaben so ministeryo tayo.—Mat. 6:33.