Mankaukolan na Panagsungdo so Panagpulong
1. Akin et maong ya ehemplo si apostol Pablo ed panagsungdo ed ministeryo?
1 Masulok a 30 taon a nanliketan nen apostol Pablo so makapnek a karera bilang ebanghelisador. Ingen, wala met iray nabet ton problema. (2 Cor. 11:23-29) Balet agtinmunda si Pablo. (2 Cor. 4:1) Amta ton sikatoy ikdan nen Jehova na biskeg pian makapansungdo. (Fil. 4:13) Lapud sayan ehemplo to, nibaga nen Pablo: “Mialig kayo komon ed siak, singa siak met ed Kristo.”—1 Cor. 11:1.
2. Antoran subok so inagew-agew a kipapaarapan na dakel natan, tan antoy makatulong ed sikaran makapansungdo?
2 Sungdoan Iray Subok Natan: Kada agew, dakel ya agagi tayo so nipapaarap ed panagbalaw, isusumpa, odino kaandiay interes na saray kapamilyaan, katrabaho, odino kaeskuelaan. (Mat. 10:35; Juan 15:20) Nayarin ontan met ed sika. Odino nayarin walay aanosan mon problema ed bunigas, odino walaray lalabanan mon pakaabalaan tan tukso ed inagew-agew. Napabiskeg itayo no nonoten tayo iray ehemplo na kapara tayon Kristianos natan a nipaarap ed saray angat balet atalonaan da iratan.—1 Ped. 5:9.
3. Antoray probisyon nen Jehova ya ontulong ed sikatayon mantultuloy ed ministeryo?
3 Nagamoran tayoy biskeg a mantultuloy ed ministeryo no isulong tayoy kompleton armas ya inter na Dios. (Efe. 6:10-13, 15) Importante met so pikakasi pian makapansungdo. (2 Cor. 6:4-7) Pian manalo ed espiritual a pilalaban, nepeg tayon talinengen iray panonot na Dios. (Sal. 119:24, 85-88) Singa ed ugaw a paulit-ulit ton babasaen so sulat ed sikato na maaron ama to, napabiskeg so relasyon tayo ed si Jehova no inagew-agew tayon babasaen so Biblia. Nagamoran tayoy dunong pian natalonaan iray subok diad regular a personal a panagaral, diad ontan et papaimpluensyaan itayo ed kanonotan na Dios ed panagdesisyon tayo tan napabiskeg so katooran tayo.—Uli. 2:10, 11.
4. Antoray nagamoran a bendisyon no matoor tayon mansungdo ed ministeryo tayo?
4 Pakabendisyonan so Panagsungdo: Singa si Pablo, no matoor tayon mansungdo diad panusumpal tayoy ministeryo, napaliket tayoy Jehova tan nabendisyonan itayo pati saray arum. (Uli. 27:11) Komon ta determinado tayon mantultuloy ed ministeryo pian napaneknekan tayon say pananisia tayo et mabiskeg tan mas “mabli nen say balitok.”—1 Ped. 1:6, 7.