Walay Inanabang Tayon Mablin Kaykayamanan
1 Amayamay so lugan na Biblia ya espiritual iran kayamanan a papablien tayo. (Sal. 12:6; 119:11, 14) Aminsan, angusar si Jesus na saray ilustrasyon a mangililitrato ed nanduruman aspekto na Panarian, insan intepet to ed saray babangatan to: “Atalosan yo ya amin so sarayan bengatla?” Sanen on kuan da, oniay inkuan to: “Kanian amin ya eskriba [odino, managbangat] ya agawan sakey a babangatan ed panarian na tawen miulibay ed sakey a too a sikatoy makan-abung, a mangala ed kayamanan to na saray bengatlan balo tan daan.”—Mat. 13:1-52.
2 Saray katuaan ed Biblia a naaralan tayo sanen onggagapo tayo ni labat a manaral et nibagan daan a kaykayamanan. Legan tayon itutultuloy a personal ya aaralen iray aragdalem a bengatla na Salita na Dios, makakaromog itayo na arum niran katuaan ed Biblia, a diad sikatayo et singa balo iran kayamanan. (1 Cor. 2:7) Ontan met, panamegley na “matoor tan makabat ya aripen,” natatalosan tayo iray balon kayamanan.—Mat. 24:45.
3 Papablien tayon maong irayan espiritual a kayamanan, daan man iratan odino balo. Sayan panamabli so mamapakiwas ed sikatayon manggunaet ya onggamor na panangipasal tan eksperiensya bilang managbangat na Salita na Dios, a mabunbunlok tayon inanabang ed arum so mabmabli iran katuaan a nanaaralan tayo.
4 Makaaral ed Ehemplo nen Jesus: Impatnag nen Jesus so nalilikna to nipaakar ed sarayan kaykayamanan. Sikatoy nansagpot na pinasya pian ninabang iratan. Anggan sanen naksawan la, sikatoy agtinmundan angipaway na kaykayamanan manlapud “kamalir” to.—Juan 4:6-14.
5 Say panangaro nen Jesus ed saray pobri ed espiritual so amakiwas ed sikaton inabang so manangiter-bilay a kaykayamanan, salanti, saray katuaan a manlalapud Dios. (Sal. 72:13) Akasian to iray nanaerasan ed espiritual, tan sikatoy apakiwas a “nambangat ed sikara na amayamay a bengabengatla.”—Mar. 6:34.
6 Aligen si Jesus: Sano papablien tayon maong so walad sikatayon kaykayamanan, magmaliw itayon magunggunaet a mangiparungtal ed saray espiritual ya ankablin bato direkta manlapud Biblia, a singa si Jesus. (Uli. 2:1-5) Anggano no maminsan et naksawan itayo, itongtong tayo iray Makasulatan a katuaan tekep na ligsan manlalapud puso. (Mar. 6:34) Say pangapresyan maong ed saray kayamanan a walad sikatayo so mamakiwas ed sikatayon gawaen so anggaay nayarian tayo ed ministeryo, a lawas panggunaetan so malaglaem a pibibiang.