‘Say Salita Yo Komon Lawas Alaokan na Asin’
1. Antoy kabaliksan na ‘alaokan na asin so salita tayo’?
1 “Say salita yo komon natekepan lawas na liga, alaokan na asin, pian nakabatan yo no panon so nepeg yo a yebat ed balang sakey.” (Col. 4:6) Say kabaliksan na laokan tayo na asin iray balikas tayo et say pamili tayo na duga iran salita tan pangibalikas ed saratan diad paraan a makapaliket ed saray makarengel. Importantin maong so panggawa ed satan legan a walad ministeryo.
2. Panon ya akapangiter na pantasi si Jesus ed sakey a Samaritana?
2 Ehemplo nen Jesus: Legan a manpapainawa ed abay na bobon, si Jesus so angigapo na tongtongan ed sakey a Samaritana ya onaasol. Legan na pantotongtong da, aminpigan amalesa imay Samaritana na punto a pakapatnagan na abayag lan irangan ed baetan na saray Judio tan Samaritano. Imbalikas to met a sisiaen ton saray Samaritano et kailalakan nen Jacob, anggaman mapekder a sisiaen na saray Judio a saray Samaritano et kailalakan na saray dayo. Imbes a sumlangen nen Jesus iray komento to, impansiansia ton positibo so tongtongan. Bilang resulta, sikatoy akapangiter na pantasi a tinmulong ed Samaritana tan ed totoo ed saman a syudad.—Juan 4:7-15, 39.
3. Panon tayon natumbok so ehemplo nen Jesus sano manpupulong itayo?
3 Legan tayon manpupulong, nepeg tayon lawas nodnonoten so gagala tayo, salanti, pian “mangitarok na saray magayaga a balita na saray maong a bengatla.” (Roma 10:15) Labay tayon inabang ed unabung so makapasagyat tan makapabiskeg a punto manlapud Biblia, tan paliisan tayon nabaloan ton krikritikoen tayo iray personal a sisiaen to. No ibalikas toy lingon panmoria to, agtayo pasyosyodoten. Wala ta ed komento to so pakapipaknaan tayo odino napangibasian tayo na masimoon a komendasyon? Nayarin iparungtal tayo so sakey a teksto tan ikuan, “Inkonsidera yo met la iya kasi?”
4. Anto so nepeg tayon gawaen no mainsulto so unabung?
4 Panon to no say unabung et mainsulto odino mapatnag lan labay to labat so misangsangan? Kaukolan tayon itultuloy ya ipatnag so inkakalma tan inkaulimek ed ikiwas tan salita tayo. (2 Tim. 2:24, 25) No ag-interesado so too ed mensahe na Panarian, maabig no mataktika itayo lan manpatanir.—Mat. 7:6; 10:11-14.
5. Panon a naeksperiensya na sakey ya agin bii iray maabig a resulta diad marespeton kakaebat to?
5 Maabig Iran Resulta: Sanen nanggunaetan na sakey ya agin bii so mantasi ed kabandaan to, sinmanok so biin akatongtong to, tan nan-ayew-ayew. Diad magalang a paraan, inkuan na agi: “Pasensia kayo la, onla ak la.” Duay simba ed saginonor, tinmoktok so bii ed abung na agi, ya onkekerew na dispensa ed sikato, tan imbalikas toy inkamabulos ton ondengel ed labay ya ibaga na agi. Say marespeton ebat so mabetbet a manresulta ed maabig!—Uli. 15:1; 25:15.
6. Akin ya importantin mangusar itayo na saray salitan atimplaan na asin sano manpupulong?
6 Panggunaetan so pangusar na saray salitan atimplaan na asin sano ipupulong so maong a balita. Anggano aglabay na unabung so ondengel, diad ontumbok sano walaray Tasi nen Jehova ya ontoktok abung to, nayarin sikatoy mabulos lan ontalineng.