Nisalba so Amin a Klase na Totoo
1. Anto so akadependian na talindeg tayo ed Dios?
1 Lapud agkanepegan a panangasi na Dios et alukasan so dalan parad kisalba. Linawa nen Jehova ya “amin a [klase na] totoo nilaban ira komon, tan ondago ra ed pakapikabat ed katuaan.” (1 Tim. 2:3, 4) Say talindeg tayo ed Dios so agmandedependi ed rasa, kabibilay, abilidad, odino itsura tayo, noagta diad pangagamil tayo na pananisia ed dondon bagat nen Jesus. (Juan 3:16, 36) Bilang kakimeyan na Dios, nepeg ya iwaklit tayo so dinanman a panaglabi, a mangimpluensya ed sikatayon mangipulisay ed saray totoon mabulos ya aawaten nen Jehova.
2, 3. Anto so makatulong ed sikatayo ya aghusgaan so totoo lapud itsura ra?
2 Paliisan so Panhusga: Onnenengneng si Jehova ed no anto so walad puso na too, ya agmannononot na makapuy odino manlalabi. (1 Sam. 16:7) Naiimano to met so potensyal da. Kanian, ipapasen to a mabli iramay malabay a mamaliket ed sikato. (Ag. 2:7) Kasin say panmoria tayo ed arum et singa ed panmoria na Dios?
3 Nayarin nataktakot itayo ed arum a totoon nasabi tayo ed ministeryo lapud itsura ra. Nayarin aliwliwa odino aliwan desente so kawes da, balbasarado, odino de-singsing so eleng odino bibil da. Arum so nayarin andian na ayaman. Arum et nayarin mapasang ed sikatayo. Imbes a husgaan iratan bilang agbalot magmaliw a managdayew nen Jehova, nepeg a positibo itayo, lapud anggan ‘sikatayo met so makulangkulang nen aminsan a panaon, matulay, tan alingo.’ (Tito 3:3) Diad pakakamoria ed saya, magmaliw itayon magunaet a manpulong ed siopaman, anggan diad saramay singano agmakanepegan lapud itsura ra.
4, 5. Antoy naaralan tayo ed saray ehemplo nen Jesus tan Pablo?
4 Saray Ehemplo nen Inmunan Siglo: Angigana na panaon si Jesu-Kristo pian tulongan iramay impasen na arum ya imposiblin magmaliw a managdayew nen Jehova. (Luc. 8:26-39) Anggaman agton balot kokonsintien so mauges iran agamil, amta to a nayarin napilanor iray totoo ed makapuy a kabibilay. (Luc. 7:37, 38, 44-48) Kanian, impatnag toy pakatalos, a “naabagey to ra, lapu ed singa ra saray karnero ya andian na managpastol.” (Mar. 6:34) Kasin naalig tayoy ehemplo to a nagkalalo?
5 Si apostol Pablo so tinupak, pinekpek, tan impriso. (Gawa 14:19; 16:22, 23) Kasin saratan ya agmaabig ya asagmak to et nanem-eman to tan inkuan to lan pipirdien to labat so panaon to ed pigaran nasyon tan etnikon grupo? Andin balot. Amta to a saray matuan impanpuson totoo et nayarin naromog ed limog na amin ya etnikon grupo, tan sikatoy determinadon anapen ira. Ontan kasi so pangipapasen tayo ed saramay walad teritorya tayo a nanduruma so kultura tan eksperiensya ra ed bilay?
6. Anto so epekto na awawey tayo ed saray balon miaaral?
6 Pangabrasa ed Arum Natan: Dakel ed saray totoo na Dios so maliket lapud saray agagin ag-onnenengneng ed itsura so mangaabrasa ed sikara ed kongregasyon. Sakey a lakin balbasarado, anggad takeb so buek to, tan marutdutak, so linmoob ed Kingdom Hall diad Alemanya. Makapuy so reputasyon to. Anggaman ontan, sikatoy inabrasa diad pantitipon na kongregasyon. Sikatoy nandinayew kanian sikatoy amawil kalabas na sakey simba. Ag-abayag, inayos toy itsura to, agla mansisigarilyo, tan inkasal to lay iyaamong to. Ag-abayag, sikaran sanasawa tan saray ananak da so manlilingkor la ed si Jehova bilang nankakasakey a pamilya.
7. Panon tayon naalig so agmanlalabi a Dios tayo?
7 Bilang panangalig ed agmanlalabi a Dios tayo, komon ta imbitaan tayo so arum a minabang ed agkanepegan a panangasi na Dios.
[Litrato ed pahina 6]
“Say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.”—Gawa 10:34, 35.