‘Manggawa na Maabig ed Amin’
1 Diad Marso 2006 ya isyu na Ministeryo Tayo ed Panarian, apaseseg itayon panggunaetan a tulongan iray interesado ya onatendi ed Memoryal panamegley na pangusar ed balon imbitasyon ed Memoryal. Bilang resulta, seguradon dakel a balo ni tan inaktibo so inmatendi ed impanselebra. Natan, ‘unong a wala so kiambegya [itultuloy tayoy] manggawa na maabig ed amin.’—Gal. 6:10.
2 Imbitaan Iran Onatendi Lamet: Diad Pilipinas, masulok a 300,000 a totoo ya aliwan manangipalapag na maong a balita so onaatendi ed Memoryal kada taon. Antoy nepeg tayon gawaen pian sagyaten iramay “suston nikiling ed andi-anggaan a bilay” a magmaliw a “mananisia”? (Gawa 13:48, NW) No posible, pasesegen iran tampol a miaral a regular.
3 Akin ya ag-imbitaan so interesado ya onatendi ed Panagaral na Kongregasyon ed Libro pian panggayagaan to so makapainteres a panagaral ed libron Apocalipsis? No kanayon odino kabkabat mo so interesado, tan walay betang mo ed Teokratikon Eskuelaan Parad Ministeryo, imbitaan mo pian narengel to itan. Lawas mon pakabatan nipaakar ed saray titulo na paliwawa ed publiko ya ipaliwawa ed manumtumbok iran simba. (Say balon eskedyul so nepeg ya ipaskil ed information board.) Tan siempre, no anggapo la so mangiyaaral na Biblia ed sikato, nayarin opresian mon iyaralan.
4 Itultuloy a Pasesegen Iray Inaktibo: Pigara ed saray onaatendi ed Memoryal et dedikado la ed si Jehova. Balet, sikaray akatunda tan aliwan aktibo ed panangipulong na maong a balita. Papasesegen itayo nen Pablo a “manggawa itayo na maabig . . . nagkalalo ed saray kaamong na pananisia.” (Gal. 6:10) Kanian, saray inaktibo so nepeg a manunan pampagaan tayo.
5 Nayarin walaray kinmiwas la ed panamaseseg na saray mamatatken pian mibiang lamet ed ministeryo. No pabtangan kayo na saray mamatatken a mikimey ed nagmaliw ya aktibo lamet, makaseguro kayo a say dilin aro yo ed si Jehova tan ed lawak na ministeryo so mamabiskeg ed panagmatalek na satan. Ipanengneng ed sikato no panon kayon mibibiang ed nanduruman aspekto na ministeryo ta pian naeksperiensya toy liket ed satan a kimey diad ontan et napaseseg a mansiansia ed satan tan makagamor na dakel a bendisyon.
6 Tulongan Iray Balon Manangipalapag a Nawalaan na Maabig a Gapo: No say iyaaralan yo na Biblia et naaprobaan la natan ya onggapon manpulong, tulongan a nawalaan na maabig a gapo. Tulongan a bayuboan toy rotina na panagparaan tan pibiang a regular ed lawak na ministeryo kada simba.
7 No anak yon mismo so naaprobaan a balon agbautismadon manangipalapag, sikatoy ulop yo ed panagpulong pian onaligwas unong ed taon tan abilidad to. Diad daiset a tulong yo, nayarin nikelawan kayo ed abilidad ton mitongtong ed arum, ed panagbasa to na Biblia, tan ed panangiyopresi to na literatura. No maabig so impitongtong to ed lawak na kimeyan, ipasal a mamawil tan mamaseseg ed saramay interesado.
8 Palaknab Yoy Dilin Ministeryo Yo: Kasin iyaabuloy na sirkumstansya yo a padaaken ni so pibibiang yo ed panagpulong a kimey anggan kayari na bulan na Abril tan Mayo? No auxiliary payunir kayo ed sayan bulan, kasin ninonot yo la so posibilidad a nitultuloy yo ni iya ed regular a paraan, odino ompan sarag yoy man-regular payunir? Tandaan a no mas dakel a panaon so uusaren tayo ed ministeryo, mas dakel met a totoo so natulongan tayon mangawat ed katuaan. (Gawa 8:26-39) Legan a tatalaranan tayoray agew ya onsabi, komon ta “tumboken [tayo] lawas so maong, ya ipakana ed sakey tan sakey tan dia ed amin.”—1 Tes. 5:15.