Saray Pakabat
◼ Opresin literatura parad Marso: Manunan ipresenta so libron Ibabangat na Biblia insan panggunaetan so pangigapo na panangiyaral na Biblia. Abril tan Mayo: Iyopresi so Say Panag-Bantayan tan Awake! Sano papawilen iray interesado, pati saramay inmatendi ed Memoryal balet ta aliwa nin aktibon mililimog ed kongregasyon, panggunaetan ya opresian ira na libron Ibabangat na Biblia, diad kalat a naiyaralan ira na Biblia. Hunyo: Iyopresi so libron Liket ed Pamilya.
◼ Papasesegen mi so amin a manplaplanon man-auxiliary payunir no Abril a manggawa la na saray plano natan tan iter da lan masakbay so aplikasyon da. Ontulong iya ed saray mamatatken ed panggawa na nakakaukolan iran uksoyan parad lawak na serbisyo tan ed pangitarya na magenap iran magasin ya usaren da. Saray kangaranan na saramay naaprobaan ya auxiliary payunir so nepeg ya iyanunsio ed kongregasyon ta pian napaseseg met iray arum a nonoten day man-auxiliary payunir ed sayan espisyal a bulan.
◼ Papasesegen so amin a mamasa ed aka-eskedyul a babasaen ed Biblia a walad 2007 Calendar tan ed Usisaen so Kasulatan ya Inagew-agew, ya onggapo no Mierkoles, Marso 28 anggad Martes, Abril 3, 2007. Sarayan agawgawa so ontutukoy ed saray agawgawa legan na unor iran agew nen Jesus diad dalin manlapud Nisan 9 anggad 14, 33 C.E.
◼ Diad pan-audit ed saray kuenta ed sayan bulan unong a nipakabat ed Pebrero a Ministeryo Tayo ed Panarian, say mangidadaulon manangasikaso so maneguro a say pan-audit et parad bulan na Disyembre, Enero, tan Pebrero.—Nengnengen so Instructions for Congregation Accounting (S-27).
◼ Nepeg ya ipaway a tampol na saray kongregasyon iray balon isyu na Say Panag-Bantayan tan Awake! no naawat da la iratan, pian nikabisado la na saray manangipalapag iray lugan na saratan antis dan iyopresi ed lawak na serbisyo. Say Ministeryo Tayo ed Panarian so nepeg met ya ipaway a tampol sano sinmabi la itan. Nayarin ibunog itan diad saray Panagaral na Kongregasyon ed Libro.
◼ No saray personal a planon pambiahe et mangilaktip ed iyatendi ed saray pantitipon na kongregasyon, asamblea, odino distriton kombension ed sananey a bansa, say ikerew yo na impormasyon nipaakar ed petsa, oras, tan saray lugar so nepeg ya isulat ed sangan opisina a mangaasikaso ed kimey ed satan a bansa. Saray address na sangan opisina so nilista ed unor a pahina na peles a Yearbook.
◼ Balon Publikasyon a Wala:
New World Translation of the Holy Scriptures (makulaney ya apis ya edisyon) —Cebuano