Repaso ed Teokratikon Eskuelaan Parad Ministeryo

Say onggendan iran tepet so singbaten diad Teokratikon Eskuelaan Parad Ministeryo legan na simba ya onggapo ed Pebrero 26, 2007. Ikondukta na manangasikaso na eskuelaan so 30-minuto a repaso a nibase ed materyal ya akobrian diad saray asainmin parad simba na Enero 1 ya anggad Pebrero 26, 2007. [Paimano: No anggapo iray reperensya kayari na tepet, kaukolan yoy mansukimat a dili pian naromog iray ebat.​—Nengnengen so Eskuelaan Parad Ministeryo, p. 36-7.]

KALIDAD NA PANAGSALITA

1. Kapigan so nepeg a pangipabitar ed praktikal ya aplikasyon na materyal tayo, tan anton paraan so nepeg a panggawa ed saya? [be p. 158 par. 1-3]

2. Akin ya importante a tulongan tayo so arum a makamoria ed praktikal a kablian na impormasyon ya iprepresenta tayo, tan panon tayon nagawaan iya? [be p. 159 par. 2-3]

3. Akin ya importante a pilien tayo iray salitan usaren tayo? [be p. 160]

4. Anto so ontulong ed sikatayon makapangusar na nanduruman salita ed suston paraan? [be p. 161 par. 5-6; p. 162 par. 1, 4]

5. Anto so pigaran kaabigan na pansalita base ed sakey ya outline a saulado odino insulat? [be p. 166 par. 1-3]

ASAINMIN NO. 1

6. Anto so nalalanor ed panangiparaan ed sakey ya asainmin ed panagbasa? [be p. 43 par. 2, 4]

7. Anto so nakaukolan pian naalig tayo so panangaro nen Jehova ed maong tan panamusol to ed mauges? (Heb. 5:14) [w05 1/1 p. 9 par. 11]

8. Anto so nepeg tayon tandaan no walay abasa tayo ed Biblia a sengegay impanduaruwa tayo no kasin kinmiwas so Dios ed makatunongan odino maptek a paraan? [w05 2/1 p. 24 par. 7]

9. Panon so nepeg ya ikiwas tayo sano walay pansumlangan na ganggan na Dios tan say ganggan na too? [w05 4/15 p. 12 par. 9]

10. Panon ya inteen nen Isaias so imano to ed say Panarian panamegley na Mesias tan ed say manangiparungtal to, si Juan a Managbautismo? [si-E p. 123 par. 35]

SINIMBAN BABASAEN ED BIBLIA

11. Anto imay “sakbong” tan say “manakbong [odino inaramey]” ya asalambit ed Isaias 25:7?

12. Panon a “nanengneng” tan ‘narengel’ na totoo si Jehova? (Isa. 30:20, 21)

13. Tua odino Tila: Say pikakasi nen Hezekias a nirekord ed Isaias 38:3 so pinakiwas lambengat na pilalek ton manbilay ni na andukdukey.

14. Panon a nayarin onkana iray Israelita bilang saray tasi nen Jehova, tan panon tayo ran naalig? (Isa. 43:10)

15. Mitunosan ed mapropetikon padron a nidatak ed Isaias 52:11, 12, anto so kinaukolan parad saramay ‘manawit ed saray kagawaan nen Jehova’?