Agmo Papaandien so Inmunan Arom
1 Oniay insimbawa na niglorian Jesus ed inmunan-siglon kongregasyon ed Efeso: “Wala so isumpak ed sika, ta inkaindan mo so akauna ya arom.” (Apo. 2:4) Mapatnag a naandi na dakel so inmunan aro ra ed si Jehova. Sanen aaralen tayo ni labat so katuaan, abayuboan tayoy mabiskeg ya aro ed Dios tan ed kaparan too, tan saya so amakiwas ed sikatayon maseseg ya inabang so ilalo a balo ni ed sikatayo. Anto so gawaen tayo sirin pian agnabalang so inmunan aro tayo tan ag-itayo ontayer ed ministeryo?
2 Personal a Panagaral tan Pipiaral: Anto ta so amakiwas ed sikatayon naaro so Dios tan say kaparan too sanen primero tayon naamtaan so katuaan? Agta say amin a naamtaan tayo nipaakar ed si Jehova diad panaaral tayo ed Kasulatan? (1 Juan 4:16, 19) Kanian, pian say aro tayo et “ondaak a lalo nin lalo,” nepeg a mantultuloy itayon onggamor na suston pikakabat, a kotkoten tayo, a singa panangibaga, iray “kaaralman a bengatla na Dios.”—Fil. 1:9-11; 1 Cor. 2:10.
3 Say pamasiansia na maabig a rotina na personal a panagaral et nayarin talagan mairap diad sarayan kaunoran ya agew a napno na saray kapagaan tan pakaabalaan. (2 Tim. 3:1) Nepeg a mangiyeskedyul tayo na panaon parad pangan na espiritual a tagano. Importante met so regular a pipiaral, nagkalautla ta “nanenengneng [tayon] manasingger la so agew.”—Heb. 10:24, 25.
4 Say Ministeryo: Say maseseg a pibibiang ed ministeryo so ontulong ed sikatayon napansiansia so inmunan aro tayo ed Dios. Legan tayon ipupulong so maong a balita, nipapanonot tayo ed inkasikatayo iray maaron sipan nen Jehova, tan ontutulong iya ed sikatayon napansiansian mabilabilay so ilalo tan aro tayo. Kaukolan so panagsukimat ed panangibangat ed saray katuaan na Biblia pian natalo-talosan tayon mismo iratan, tan napabiskeg na saya so pananisia tayo.—1 Tim. 4:15, 16.
5 Si Jehova et makanepegan na amin a bengatla, kabiangan lay panangaro tayo. (Apo. 4:11) Agmo papaulyanan a naumas itan. Pansiansiam a mabiskeg so inmunan arom panamegley na personal a panagaral na Biblia, regular a pipiaral, tan maseseg a pangiyabawag ed arum no antoy sankablian ed pusom.—Roma 10:10.