Makpel Ingen ta Mikakareenan
1 Dakel iray totoon napupulongan tayo a mangibabalikas na saray masimoon a papanisiaan da ya agmitunosan ed katuaan na Biblia. Anggaman nepeg a makpel itayon manpulong, labay tayo met so magmaliw a ‘mikakareenan ed ganaganay totoo’ tan paliisan so agmakatunongan a pakaopendi ed arum. (Roma 12:18; Gawa 4:29) Panon itayon magmaliw a makpel ingen ta mikakareenan, legan tayon iprepresenta so mensahe na Panarian?
2 Anapen so Napampaknaan Yo: Say toon mikakareenan et ompapaliis ed saray sangsangan. Say agmet kapilitan a panuppiat ed abayag lan sisisiaen na unabung et agpansengegay pangawat to ed mensahe tayo. No aliway imbaga to, nayarian tayoy mataktikan mangiparungtal na sakey a punto a nayarin pipaknaan to. No samay napampaknaan so idanet tayo, nayarin naekal so antokaman a negatibon liknaan da, diad ontan et natenyeg tayo so puso ra.
3 No palampasen tayo labat la so agsuston panmoria na unabung, kasin mikokompromiso odino palelemewen tayo so belat na katuaan? Andi. Say kimey tayo bilang Kristianon ministros et aliwan say panuppiat ed kada lingon ideya a nibaga ed sikatayo, noag say pangipulong ed maong a balita na Panarian na Dios. (Mat. 24:14) Imbes ya alablabas so reaksion tayo sano walay nibalikas ya agsuston panmoria, moriaen tayo itan bilang pankanawnawa pian natebek so nononoten da.—Uli. 16:23.
4 Pansiansiaen so Dignidad na Unabung: Walaray pankanawnawa sano kaukolan a nawalaan itayo na pakpel tan tepel sano susuppiaten iray lingon bangat. Balet, bilang mikakareenan, agtayo mamabalaw nisay manguusar na makapainsulto iran termino pian deskribien iramay mananisia tan mangibabangat na aliwa. Say inkatangas so mamaarawi ed saray totoo, ingen ta say mapaabeba tan maabig ya awawey so mangilukas ed kanonotan na saray mangaaro ed katuaan. Say pangipatnag na respeto ed saray kakatongtongen tayo tan ed saray sisiaen da so mamasiansia ed dignidad da, diad ontan et mas mainomay dan awaten so mensahe tayo.
5 Inkonsidera nen Pablo iray sisiaen na saramay pinulongan to tan nanggunaetan ton iparungtal so maong a balita diad paraan a manenyeg ed puso ra. (Gawa 17:22-31) Sikatoy sipaparaan a nagmaliw ya “amin a ganagana ed amin day totoo” pian ‘nilaban to iray arum.’ (1 Cor. 9:22) Nagawaan tayo met itan diad pagmaliw a mikakareenan legan tayon makpel ya ipupulong so maong a balita.