Sigpot a Minabang ed Saray Pantitipon Parad Lawak na Kimeyan
1. Panon itayon natulongan na saray pantitipon parad lawak na kimeyan?
1 Saray epektibon pantitipon parad lawak na kimeyan so mangitarya na peteg a panamaseseg tan praktikal a bilin sakbay itayon onla ed ministeryo. Saratan so ontulong ed sikatayon minabang ed inggrupon panagpulong ta pian makapikimey itayo ed arum, tan sikatayoy makapantutulongan tan makapanaaralan. (Uli. 27:17; Ecl. 4:9, 10) Anto so nagawaan tayo ta pian sigpot itayon minabang ed sarayan pantitipon?
2. Anto so pigaran bengatla a nayarin ikonsidera na mangidaulo?
2 Say Mangidaulo: Say espisipikon impormasyon a konsideraen ed sarayan pantitipon et kaslakan ya agnidadatak ya akadkauna. Sirin, nakaukolan so maong a preparasyon no sikayo so mangidaulo. Agyo automatikon iplaplano so pangonsidera ed inagew-agew a teksto, anggaman nayarin desidien yon isingbat itan no direktan mitukoyan ed ministeryo. Isipen no anto so praktikal a nitulong ed saramay manpulong ed saman ya agew. Alimbawa, nayarin labay yon isingbat odino idemostra so sakey a presentasyon. Nayarin desidien yon repasoen so sakey a punto diad libron Reasoning, diad libron Eskuelaan Parad Ministeryo, odino sakey a parte diad agano nin Pantitipon Parad Panagserbi. Diad arum iran pankanawnawa et nayarin ikonsidera yo no panon ya arapen so sakey ya angat a nayarin onlesa ed teritorya yo, odino nayarin isingbat yo no panon a bayuboan so interes tan igapo iray panangiyaral na Biblia, nagkalalo la no dakel a manangipalapag so manggaway panagpawil. Antokaman so bengatlan ikonsidera, magmaliw ya entusiastiko tan positibo.
3. Panon kabayag so pantitipon, tan anto so nepeg a gawaen legan na satan?
3 Igapo ed suston oras so pantitipon, anggan amta yon walaray naatrasado. Usaren so maabig a pakatebek diad pangorganisa ed saray grupo, tan itarya so teritorya ed saramay mankaukolan ed satan. Say kabayag na pantitipon et nepeg ya ag-onlampas ed 10 anggad 15 minutos tan mas antikey ni ingen no gawaen itan kayari na aral. Sakbay a saraan iyan pantitipon, nepeg ya amta la na amin no siopa so nakaulop da tan no iner so pampulongan da. Nepeg a sampotan so pantitipon panamegley na pikakasi.
4. Anto so makatulong ed amin pian sigpot a minabang ed saray pantitipon diad lawak na kimeyan?
4 Nayarian Yo so Ontulong: Singa ed saray pantitipon na kongregasyon, nipatnag tayo so respeto ed si Jehova tan konsiderasyon ed arum no onsabi itayon masakbay. Mibiang kayo ed pantotongtong. Abuloyan so mangidadaulo a manuro ed nakaulop yo, odino nayarin desidien yo la sakbay na pantitipon no anto iray dilin uksoyan yo. No kaliktan yo so nawalaay dilin uksoyan yo, panggunaetan a ‘palaknaben’ so piulop ed nanduruman manangipalapag, imbes a say naynay yon kaulop et saray maapit a kaaro yo. (2 Cor. 6:11-13, NW) Kayari na pantitipon, agkayo la misasalatan na kaulop odino mangiyareglo na sananey niran uksoyan, tan onla kayo lan tampol ed teritorya.
5. Anto so gagala na saray pantitipon parad lawak na kimeyan?
5 Say gagala na pantitipon parad lawak na kimeyan et mipadpara ed arum niran pantitipon ed kongregasyon. Niyuksoy iratan ta pian ‘makapanpapagalangan itayo ed sakey tan sakey pian makapanaayatan itayo ed aro tan dia ed saray maabig a gawa.’ (Heb. 10:24, 25) No panggunaetan tayo so minabang ed sarayan pantitipon, natulongan itayon manumpal ed ministeryo tayo—a talagan ‘maabig itan a kimey’!