Anto so Iyuuna Yo?
1 Panon yon ebatan iyan tepet? Siempre, labay tayon amin ya iyuna so intereses na Panarian. (Mat. 6:33) Balet nayarin oniay itepet tayo ed inkasikatayo, ‘Kasin napatnagan ed saray pipilien ko a talagan iyuunak itan?’ Oniay ipapaseseg ed sikatayo na Biblia: “Dalepdep yo ed sikayon dili, no wala kayo ed pananisia.” (2 Cor. 13:5) Panon tayon napaneknekan ed inkasikatayo ya iyuuna tayo so Panarian?
2 Say Panaon Tayo: Nayarian tayon usisaen ya unona no panon tayon uusaren so panaon tayo. (Efe. 5:15, 16) Kaunongan karakel ya oras ed kada simba so uusaren yo diad piduduypo ed arum, pambabantay na telebisyon, panguusar na Internet, odino panggegemtan ed sakey a paboriton kimey? No isulat tayo so karakel na oras ya uusaren tayo ed saratan a bengatla tan ikompara itan ed karakel na oras ya uusaren tayo ed espiritual iran kimey, nayarin nasurprisa itayo. Kasin dakdakel ya oras so uusaren tayo ed trabaho anggano napaulyanan la so sagradon panaglingkor ta pian nagegemtan tayo lambengat so amin a labay tayo? Kaunongan kabetbet so pangisasakripisyo tayo ed saray pantitipon odino say ministeryo pian makapampasyar labat legan na sampot-simba?
3 Iletneg Iray Prayuridad: Maslak ed sikatayo so andian na magenap a panaon pian gawaen so amin a labay tayo. Ta pian niyuna tayo iray intereses na Panarian, nakaukolan tayon usisaen iray prayuridad tayo insan iyeskedyul so oras parad “bengatla ran sankaabigan” odino lalon importante. (Fil. 1:10) Laktipen na saraya so panaral ed Salitay Dios, pibiang ed ministeryo, pangasikaso ed pamilya, tan iyatendi ed saray Makristianon pantitipon. (Sal. 1:1, 2; Roma 10:13, 14; 1 Tim. 5:8; Heb. 10:24, 25) Makagunggona so arum iran aktibidades, a singa say kabkaabigan ya ehersisyo tan maabig a panligliwaan. (Mar. 6:31; 1 Tim. 4:8) Balet sarayan agtanton importantin bengatla so nepeg ya ag-onsalat ed intereses na Panarian.
4 Inyuna na sakey a kalangweran a laki so intereses na Panarian diad inloob to ed sigpot-panaon a ministeryo imbes a gegemtanen so atagtagey ya edukasyon bilang preparasyon ed sekular a karera. Sikato so nanaral na sananey a lenguahe tan inmalis ed lugar a walaay babaleg a pankaukolan. Oniay inkuan to: “Panliliketan ko so onian kabibilay ko. Makapabiskeg a maong so ministeryo! Pilalek ko ya onia met komon so gawaen na amin a kalangweran ta pian nalikna ra met so naliliknak. Anggapo lay magmaong ni nen say panlingkor ed si Jehova tekep na amin a walad sikatayo.” On, say pangiyuna ed Panarian so mangitarok ed sikatayo na saray bendisyon, balet say mas importante et mamapaliket itan ed mangatatawen ya Ama tayo, si Jehova.—Heb. 6:10.