No Panon Mon Nakapet Iray Espiritual a Kalat Mo
1. Antoray espiritual a kalat na dakel a kalangweran a Kristiano?
1 Bilang kalangweran a Kristiano, seguradon saray kalat mo et naimpluensyaan na panangarom ed si Jehova tan saray salita nen Jesus ed amin a Kristiano ya ‘anapen nin unona so panarian.’ (Mat. 6:33) Nayarin kalat mo so pamalaknab ed ministeryom panamegley na panlingkor bilang payunir odino panlingkor ed pasen a mas baleg so pankaukolan parad saray manangiyabawag na Panarian. Walaray arum a nayarin nononoten day pamboluntaryo ed kimey a panagpaalagey na saray Kingdom Hall, panlingkor ed Bethel, odino pankimey bilang misionaryo. Agaylan makapnek tan nakomendaan irayan kalat!
2. Anto so ontulong ed sikan nadampot iray espiritual a kalat mo?
2 Say sakey a makatulong pian nadampot mo so espiritual a kalat mo et say pangisulat ed saratan. Inkuan na Hulyo 15, 2004 a Panag-Bantayan: “Say agmalinew ya ideya so magmaliw a malinew tan mabitar sano ibesngaw tayo iratan ed salita. . . . Maabig sirin no isulat iray kalat [mo] tan say paraan na pakadampot ed saratan.” Niarum ni, saray kalat a maganon nadampot so ontulong ed sikan seguroen so iyaaligwas mo tan napansiansiam ya akateen so imanom legan mon dadampoten iray manbayag a kalat mo.
3. Mamitla na saray kalat a maganon nadampot ya ontulong ed sakey pian onkualipika ed bautismo.
3 Saray Kalat a Maganon Nadampot: No agka ni bautismado, nonoten no antoy nakaukolan mo pian nakapet itan a kalat. Nayarin kaukolan mon talosan a nagkalalo iray manunan bangat na Biblia. No ontan, gawam a kalat so mapetepet a panaral ed libron Ibabangat na Biblia, tekep na pamasa ed saray nisitan teksto. (1 Tim. 4:15) Gawam met a kalat so pamasa ed interon Biblia manlapud Genesis anggad Apocalipsis, a singa met ed kakaukolanen ed saray Bethelite tan saray estudyante na Gilead. Kayari na satan, itultuloy so regular a programa na inagew-agew a pamasa na Biblia. (Sal. 1:2, 3) Nonoten pa labat no panon kan natulongan na satan ya onaligwas ed espiritual! Kada manbasa ka na Biblia, gapoan tan sampotan mo itan ed impapuson pikakasi, tan panggunaetan mo lawas ya iyaplika iray naaaralan mo.—Sant. 1:25.
4. Antoran maganon nadampot a kalat so nayarin iletneg na sakey a Kristiano a kalat toy manlingkor ed Bethel odino manmisionaryo?
4 No bautismado ka la, anto niray kalat a nayarian mon dampoten? Kasin kaukolan mon paaligwasen so dunong mo ed panagpulong? Alimbawa, nayarian mo ta’n gawaen a kalat so pagmaliw a mas marunong ed panangusar ed Salitay Dios ed ministeryo? (2 Tim. 2:15) Panon mo kasin napalaknab so ministeryom? Mangiletneg ka na espisipiko iran kalat a mitukoyan ed edad mo tan ed saray sirkumstansyam ya ontulong ed sikan nadampot iray manbayag a kalat mo.
5. Panon ya akatulong ed sakey ya agin laki so impangiletneg na maganon nadampot iran kalat pian nadampot toy kalat a panlingkor ed Bethel diad arapen?
5 Sakey ya Istorya na Intalona: Sanen binmisita ed sangan opisina na saray Tasi nen Jehova si Tony a manedad na 19, sikatoy awalaan na pilalek a manlingkor ed Bethel. Balet ta makapuy so estilo na kabibilay to, tan agto ni ingen indedikay bilay to ed Dios. Denesidi nen Tony ya itunos so kabibilay to ed saray daladalan nen Jehova tan ginawa ton kalat so onkualipika ed bautismo. Sanen akapet to la itan, ginawa ton kalat so man-auxiliary payunir insan man-regular payunir, ya isusulat to ed kalendaryo so petsa a labay ton pangigapo. Nonoten pa labat so liket to sanen kalabas na pigaran panaon na impanpayunir to et sikatoy naimbitaan a manlingkor ed Bethel!
6. Anto so makatulong ed sika a mandampot ed saray espiritual a kalat mo?
6 Nayarian mo met a dampoten iray espiritual a kalat mo legan mon iyuuna iray interes na Panarian. Ipikasim a naynay ed si Jehova ‘iray kimey’ mo tan panseetan mon dampoten iratan.—Uli. 16:3; 21:5.