Kasin Makadesisyon La so Anak Yo?
1. Anto so determinasyon na saray kalangweran a Tasi nipaakar ed panangusar na dala? Mangiter na sakey ya alimbawa.
1 Makadesisyon ed anto? Nipaakar ed panagpasaksak na dala. Unong a nipaamta la ed artikulo ya apauloan na “Walk as Instructed by Jehovah” ed Hunyo 15, 1991, a paway na The Watchtower, kaukolan a walaay malinew tan mapekder a talindeg iray anak na saray Tasi nen Jehova pian paneknekan dan say pilalek dan pangunor ed ganggan na Dios nipaakar ed dala et importante ed sikara a singa met ed saray atateng da. Kasin kakaukolanen met itan ed menor de edad nin anak yo?
2. Anton legal a totontonen so inyaplika na sakey a korte ed menor de edad ya ag-onabuloy a pasaksakan na dala, tan antoy naaralan na Kristianon atateng tan saray menor de edad ya anak da ed saya?
2 Antoy Ibabaga na Ley? Diad panrepaso ed kaso na 17 años ya agin bii ya ag-inmabuloy a pasaksakan na dala, oniay impaakseb na Illinois Supreme Court diad Estados Unidos: “No malinew tan makakombinse so ebidensya a say menor de edad et singa la adulto a natatalosan toray pansumpalan na saray kiwas to [tan] makadesisyon la, no ontan et iyabuloy na niletneg lan ley a say makadesisyon lan menor de edad so ikday kanepegan a mangawat odino andi ed paraan na panagtambal.” Kanian, diad panetermina no kasin say ugaw nin pasyente et makapandesisyon lan bukor, saray doktor odino opisyales so nayarin mantepet ed sikato pian dengelen day personal a desisyon ton ag-awaten so dala. Kaukolan a natatalosan na kalangweran so inkaseryoso na medikal a kipapasen to tan saray pansumpalan na saray pilien ton panagtambal tan malinew tan mapekder ton ibalikas so dilin sisiaen to nipaakar ed ganggan na Dios ed dala.
3. Antoran tepet so nepeg a nonoten a maong na atateng, tan akin?
3 Antoy Ibaga na Anak Yo? Kasin akaparaan a maong so ananak yo ya ibalikas no antoy walad puso ra nipaakar ed sayan isyu? Kasin sisiaen da ed interon puso ra ya igaganggan na Dios so ‘iyarawi ed dala’? (Gawa 15:29; 21:25) Kasin sarag dan nipaliwawa so sisiaen da manlapud Biblia? Kasin anggan anggapo iray atateng da et makpel dan idepensa so mapekder a desisyon da nipaakar ed dala no ipasen na saray doktor a delikado so bilay da? Lapud say “panaon tan ag-iilaloan iran nagawa et onsabi ed [sikatayon] amin,” panon yon iparaan iray ananak yo ed dinanman ya ag-iilaloan a subok ed katooran da?—Ecl. 9:11, NW; Efe. 6:4.
4, 5. (a) Antoy responsabilidad na atateng, tan panon dan nagawaan itan? (b) Antoray probisyon ya ontulong ed atateng?
4 Atateng, Anto so Nagawaan Yo? Responsabilidad yon ibangat ed ananak yo so panmoria na Dios ed dala. (2 Tim. 3:14, 15) Say malinew ya eksplinasyon so naromog ed libron Reasoning, ed pahina 70-4. Aralen itan a maong a kaibay pamilya yo. Usaren so “If Someone Says—” ed pahina 74-6, gawaen so panagpasal a kaibay ananak yo pian nipasal iran mangipaliwawa no antoy sisiaen da tan akin. (1 Ped. 3:15) Arum ed saray probisyon parad pakabangatan tayo nipaakar ed isyu a dala et say brosyur a How Can Blood Save Your Life? tan Say Panag-Bantayan a Hunyo 15, 2004, pahina 14-24. Niarum ni, saray programa ed video a Transfusion-Alternative Health Care—Meeting Patient Needs and Rights tan No Blood—Medicine Meets the Challenge, a diad peles et wala la’d DVD ya apauloan na Transfusion Alternatives—Documentary Series, so mangipapagamor na makakombinsin impormasyon nipaakar ed inkamakatunongan tan inkaepektibo na panagtambal tan panag-opera ya ag-uusaran na dala. Kasin binantayan tan siningbat la na pamilya yo irayan presentasyon ed agano ni?
5 Tulongan so ananak yo a ‘nasali no anto so maong, tan makapaliket, tan nasnaspot a linawa na Dios’ nipaakar ed dala. Diad ontan et makapanggawa ira na desisyon a bendisyonan nen Jehova.—Roma 12:2.