Ipatnag so Personal ya Interes—Diad Pagmaliw a Mainomay ya Onadapta
1 Angipanengneng si apostol Pablo na maabig ya ehemplo diad lawas pangiyaadapta to’d panangiparungtal toy maong a balita ed kipapasen tan panagnonot na dumerengel to. (1 Cor. 9:19-23) Nepeg a panggunaetan tayo met itan. No nonoten tayo lan masakbay, kaslakan et nitukoy-tukoy tayo iray pangaligan a presentasyon a nipaparungtal ed Ministeryo Tayo ed Panarian unong ed pankaukolan na saray totoo ed teritorya tayo. Legan ya onaasingger tayo ed puerta, nayarin naimano tayo iray pakapatnagay interes na unabung tan ilaktip tayo iraya ed saray presentasyon tayo. Ingen, walay sananey nin paraan a magmaliw itayon mainomay ya onadapta dia ed ministeryo tayo.
2 Itukoy so Presentasyon ed Ibaga na Arum: Sano iprepresenta tayo so maong a balita, kaslakan lan mantetepet itayo tan kekerewan tayo na ebat iray unabung. Panon yon momoriaen so ebat da? Kasin agyo ikdan na importansia so imbaga ra tan ituloy labat lay imparaan yon presentasyon? Odino napatnagan ed komento yo ya ikokonsidera yo ray ibabaga na saray unabung? No mangipanengneng kayo na masimoon ya interes ed ibabaga na arum, nayarin makapangusar kayo na kaaruman iran mataktikan tepet pian naamtaan so peteg a walad nonot da. (Uli. 20:5) Diad ontan et saray aspekto na mensahe na Panarian a direktan mitukoyan ed saray paninteresan na katongtong yo so nipabitar yo.
3 Kakaukolanen na saya a mabulos tayon itongtong so arum nin pamaakaran likud ed implano tayon itongtong. No bilang kinomentoan tayo so sakey a probleman nibalita balet ta say saglawien na unabung et sakey a lokal odino personal ya isyu a mangaalay imano to, say masimoon ya interes tayon nitarya so pankaukolan na unabung so mamakiwas ed sikatayon iyapasakey ed saray pamaakaran ya importante ed sikato so pantotongtong tayo nipaakar ed Biblia.—Fil. 2:4.
4 Itukoy so Metodo Tayo: Sano mantepet so unabung, nayarin magmaong no ituloy tayo la so tongtongan diad saginonor no akaromog itayo la na kaaruman ya impormasyon nipaakar ed satan. Nayari tayo met a mangiyopresi na saray publikasyon a mas malaknab ya aningbat ed tema. Amin na saraya so mangipatnag na masimoon ya interes tayon tulongan so arum a makapikabat ed si Jehova.—2 Cor. 2:17.