Repaso ed Teokratikon Eskuelaan Parad Ministeryo
Say onggendan iran tepet so singbaten diad Teokratikon Eskuelaan Parad Ministeryo legan na simba ya onggapo ed Disyembre 26, 2005. Ikondukta na manangasikaso na eskuelaan so 30-minuto a repaso a nibase ed materyal ya akobrian diad saray asainmin parad simba na Nobyembre 7 ya anggad Disyembre 26, 2005. [Imanoen: No anggapo iray reperensya kayari na tepet, kaukolan yoy mansukimat a dili pian naromog iray ebat.—Nengnengen so Eskuelaan Parad Ministeryo, p. 36-7.]
KALIDAD NA PANAGSALITA
1. Anto so nagawaan tayo pian naseguron say panamilin tayo et niiter “lapud aro”? (Filem. 9) [be p. 266]
2. Diad antoran paraan a ‘makapanbilin itayo panamegley na bangat a mabunigas’? (Tito 1:9, NW) [be p. 267 par. 1-2]
3. Akin ya importantin gawaen a makapaseseg iray paliwawa tayo, tan panon tayon nagawaan iya? [be p. 268 par. 1-3, kahon]
4. Bilang pangalig ed si Moises, panon a mamaseseg so pangipanonot ed arum ed saray agawaan la nen Jehova parad totoo to? (Deu. 3:28; 31:1-8) [be p. 268 par. 5–p. 269 par. 2]
5. Akin a makapaseseg ed saray dumerengel tayo so maliket a panagsalita nipaakar ed gagawaen nen Jehova natan tan ed gawaen to ni ed arapen? [be p. 270-1]
ASAINMIN NO. 1
6. Anto so Septuagint, tan akin ya interesado iray Kristiano ed satan? [si-E p. 307 par. 12–p. 310 par. 14]
7. Sioparay Masorete, tan anton kabkabat a kontribusyon so agawaan da diad panangipatalos ed Biblia? [si-E p. 310 par. 18; p. 311 par. 20-1]
8. Anto so angibasiyan ed manunan teksto na Hebreon seksion na New World Translation ed Ingles, tan akin a nibagan napandependian tan napanmatalkan iyan patalos? [si-E p. 312 par. 28, 30]
9. Panon ya impatnag na saray inmuunan Kristiano so pirmin pampilalek a nipalapag so Salita na Dios? [si-E p. 315 par. 1-5]
10. Anto so ipaparungtal na impanaral ed saray wala niran manuskrito tan teksto na Masanton Kasulatan nipaakar ed Biblia? [si-E p. 320 par. 32]
SINIMBAN BABASAEN ED BIBLIA
11. Kasin say ag-impangiyabuloy ed si David a mangipaalagey ed templo so pakapatnagan ya ag-inabobonan nen Jehova iray impibakal nen David? (1 Awa. 22:6-10)
12. Diad pikakasi nen Solomon diad dedikasyon ed templo, panon ton binidbir ya aglambengat iimanoen nen Jehova iray nakaukolan na saray lingkor To bilang grupo noagta amta To met so kipapasen a kidudungetan na kada indibidual ya ontatakot ed sikato? (2 Awa. 6:29, 30)
13. Anto so “uhas-kanding iran demonyo” a tinukoy na 2 Awaran 11:15, diad New World Translation?
14. Lapud ginmapo so impanuley nen Baasa nen “komatlo a taon nen Asa” tan nanari ed loob na 24 labat a taotaon, panon tayon napantunosan so intatdang nen Baasa “sumpa ed Juda” dia ed “komatalomplo tan anem a taon na impan-ari nen Asa”? (1 Ara. 15:33; 2 Awa. 16:1)
15. Panon a malinlinew ya iyiilustra na 2 Awaran 20:22, 23 so nagawa ed mundo nen Satanas?