Tepet

◼ Panon a nasasalipotpotan iray gastos na manangasikaso na sirkito sano ombibisita ed kongregasyon?

Diad kaslakan, say panayaman tan taganoen so boluntaryon itatarya na saray agagi ed kongregasyon a bibisitaen tan saya so aapresyaen na sangan opisina. Panon to balet iray pasahe odino arum niran nayarin gastos to legan na simba? Anggaman akaparaan so sangan opisina a mansalipotpot ed saraya, dakel a kongregasyon so mabulos ya ontulong ed arum odino ed amin na sarayan gastos, tan no ontan, diad pansampot na dalaw, saray mamatatken so nayarin mantepet ed manangasikaso na sirkito no walaray gastos ya isubmite to. Insan to nayarin iter so listaan na saray gastos to katekep iray resibo. Panon ya iyuksoy na kongregasyon so pansalipotpot ed saraya? Saya so nepeg a gawaen panamegley na sakey a resolusyon ya ipresenta ed kongregasyon diad unonan Pantitipon Parad Panagserbi kayari na bisita. Satan a resolusyon so nepeg ya ibase lambengat ed no antoy wala la ed pundo na kongregasyon.​—Parad impormasyon nipaakar ed saray resolusyon, nengnengen so “Tepet” ed Pebrero 1994 na Ministeryo Tayo ed Panarian, Pahina 2.

No anggapoy pundo na kongregasyon, aliwan matukoy parad saray mamatatken so pangolekta na pundo ed saray indibidual parad sayan gagala. No ontan so kipapasen, isubmite labat la na manangasikaso na sirkito ed sangan opisina iray gastos to diad pansampot na bulan. Balet, no labay na arum a manangipalapag so mangiter na personal a tulong ed manangasikaso na sirkito, nayari dan gawaen itan. No iyespisipiko ra a satan so tulong parad pangobre ed arum a gastos to, sirin et ibawas to so kantidad na sayan tulong ed saray gastos a kerewen ton salipotpotan na sangan opisina. Nepeg ya agmanlapu ed pundo na kongregasyon iray tulong a kuarta, salambengat so agastos ya ipawil.

No ag-asinggeran na mamatatken so manangasikaso na sirkito pian paisubmite iray gastos to, sirin et kerewen to a salipotpotan na sangan opisina iray gastos to ya ag-asalipotpotan na kongregasyon. (od, p. 49) Agbalot nepeg ya asinggeran na manangasikaso na sirkito so kongregasyon pian paipawil ed sikara iray agastos to, noagta isubmite to iray gastos to sano kerewen lambengat itan ed sikato na mamatatken tan sano say kongregasyon so makayari tan mabulos ya ontulong.

Aapresyaen na sangan opisina so panusuporta na saray kongregasyon ed manangasikaso na sirkito legan na bisita to, ya onkakanan baleg a kontribusyon ed sankamundoan a kimey.​—Heb. 13:16.