Asingger la so Agew nen Jehova
1 Pampilpilalekan na saray Kristiano so isabi na agew nen Jehova sano deralen to lay peles a sistema na bengabengatla tan itarok to lay matunong a balon mundo. (2 Ped. 3:12, 13) Lapud agtayo amta no kapigan so eksakton isabi na satan, nepeg a mantultuloy itayon manbantay tan tulongan so arum a magmaliw met ya ontan. (Eze. 33:7-9; Mat. 24:42-44) Say pandalepdep ed mapropetikon Salita na Dios so mamabiskeg ed kombiksion tayo ya ‘asingger lay baleg ya agew nen Jehova.’—Sof. 1:14.
2 Say Pantutumbokan na Saray Pakayari ed Mundo: Unong a nirekord ed Apocalipsis 17:9-11, si apostol Juan so anaglawi ed “pitoran arari,” a mangirerepresenta ed pitoran mantutumbokan a pakayari ed mundo. Tinukoy to met so “komawalo [ya ari],” a natan et mangirerepresenta ed Nasyones Unidas. Wala ta ni iilaloan tayon onsublay a pakayari ed mundo? Anggapo la lapud ibabaga na propesiya a say komawalon ari so “onla ed kabalangan” odino naderal, a kayari na satan et anggapo lay abitlan arum nin mangaraldalin ya arari. Natetebek yo ta ed sayan propesiya no iner lay kawalaan tayo ed agus na panaon?
3 Say Daniel 2:31-45 so ontulong ed sikatayon natalosan so isabi na agew nen Jehova. Diad satan a propesiya, say abalbaleg ya imahen ya akugip nen Nabucodonosor so mangirerepresenta ed mantutumbokan a pakayari ed mundo. Kada sakey ed sarayan pakayari so tinmalindeg la. Dinan lan pakayari so manuuley natan? Samay isisimbolo na saray sali na imahen. Malinlinew so impaneskribe na propesiya ed onsublay a nagawa. Say uley na too so sigpot a naderal, insan onsublay so “panarian ya anggan kapigan agnaani naderal.” Natetebek yo ta no panon ya ipapabitar na saya ya asingger lay agew nen Jehova?
4 Kaaruman nin Ebidensya: Nanenengneng tayon mismo so kaaruman nin ebidensya ya asingger lay agew nen Jehova. Naiimatonan tayo so kasusumpal na samay impropesiya nen apostol Pablo nipaakar ed ug-ugali na totoo “ed saray kaunoran ya agew.” (2 Tim. 3:1-5) Tan mibibiang itayo ed sankamundoan a panagtasi a nepeg a niiter antis na isabi anggaan. (Mat. 24:14) Komon ta mantultuloy a napatnagan ed mapublikon ministeryo tayo so inkaapuraan na inyabawag na anghel: “Takotan yo so Dios, tan iter yo ed sikato so gloria: ta say oras na panangukom to sinmabi la.”—Apo. 14:6, 7.