Nepeg Tayon Respetoen so Autoridad nen Jehova
Anton walna so nanonotan yo ed totoo nensaman a manngaran na Core, Datan, tan Abiram? Panagrebelde! Ed anto? Ed autoridad na Dios. Saray detalye na makapasinagem a nansumpalan da so nikurit ed Numeros kapitulo 16, tan naromog so segek na satan diad artikulon “Matoor a Manpasakop ed Maridios ya Autoridad” diad Agosto 1, 2002, a Panag-Bantayan. Makatulong ed sikayo so pambasa ed sayan materyal insan bantayan so impangiyakto ed satan diad video a Respect Jehovah’s Authority. Nanengneng yo so linmesan pansumlangan na saray matoor ya ilalak nen Core tan say rebelden ama ra, a sinmumpa ed Soberano na uniberso. (Num. 26:9-11) Nepeg a napaseseg itayon amin na sayan tudtuan agawa a drama a bayuboan a nagkalalo so katooran tayo ed si Jehova.
Legan yon babantayan so video, anap yo iray paneknek ed insaew nen Core tan saray kapara ton rebelde ed subok na katooran diad anemiran importantin pamaakaran: (1) Panon dan agnerespeto so autoridad na Dios? (2) Panon dan inabuloyan so inkamapaatagey, ambisyon, tan imon a mangapekta ed sikara? (3) Panon dan inyapasakey so imano ra ed saray kakabosan na saramay tinuro nen Jehova? (4) Anton mareklamon ugali so abayuboan da? (5) Akin a nagmaliw iran agkontento ed saray pribilehyo ra ed panaglingkor? (6) Panon dan inabuloyan so katooran da ed kakaaro tan pamilya ya anaeg ed katooran da ed Dios?
Konsideraen no panon ya onaplika iray naaralan a leksion ed sayan drama ed Biblia diad personal a panmoria tayo ed autoridad na Dios natan: (1) Panoy nepeg ya ikiwas tayo ed saray desisyon na mamatatken ed kongregasyon, tan akin? (2) Panon tayon nalabanan so antokaman ya agmanepeg iran motibo tayo? (3) Panoy nepeg ya ikiwas tayo ed saray ag-inkayadyari na saramay aturon mangidaulo? (4) Antoy kaukolan tayon gawaen no nababayuboan tayo so mareklamon ugali? (5) Panoy nepeg a pangipasen tayo ed antokaman ya impabtang ed sikatayo a pribilehyo? (6) Siopay agbalot nepeg a manaeg ed katooran tayo ed Dios, tan kapigan iya magmaliw a mairap a subok ed sikatayo?