Tepet
◼ Kaukolan tayo ni kasin salambiten ed unabung so uksoyan ed panagdonasyon kada ondalaw itayo ed sikato?
Andi. Nakaukolan ya usaren so suston pakatebek ed sayan pamaakaran. Kaliktan tayon ipalinew ed kanonotan na totoo a say kimey tayo et peteg a panagbangat na Biblia, aliwan panaglako. Ag-itayo mankokolekta na saray donasyon.
Kaslakan a maabig ya ipaliwawan malinew no panon a susuportaan na boluntaryo iran donasyon so kimey tayo diad primeron pangitilak tayo na literatura ed interesadon totoo. Lapud ititilak tayo iray literatura ed saraman lambengat so mangipapanengneng na interes tan ed saraman so malabay a manbasa ed literatura tayo, kaslakan lan maliket iratan a totoo a mandonasyon.
Diad onsaginonor iran idalaw et dakel ed sarayan interesadon totoo so manbulon lan mangiter na boluntaryo iran donasyon. Nayarin tepeten na arum no sampiga so literatura. Nayarin antikey labat ya ibaga tayon aliwan negosyo so kimey tayo, ya ipaliwawan agpababayaran so literaturan inyopresi tayo, balet siopaman a malabay a mansuporta ed sankamundoan a kimey so makapangiter na kabkakaabigan a boluntaryon donasyon. Sano matukoy, panapanaon a salambiten so panuporta ed sankamundoan a kimey no agni nagagawaan itan na dadalawen tayon too.
Lawas nonoten ya anggaman agtayo pababayaran so literaturan iyoopresi tayo, baleg a kantidad na kuarta so nalalanor diad pangipapalapag tan pangibubunog ed saray literatura tayo. Balanglan mandonasyon odino andi so unabung, nepeg ya ipasen na amin a manangipalapag tan payunir a responsabilidad dan suportaan so sankamundoan a kimey anggad nayarian da. Nayarin gawaen na arum iya sano mangala ira na literatura odino nayarin mangiter ira na espisipikon donasyon a sinimba odino binulan. Sano gawaen itan, kaukolan a diad mauksoy tan regular a paraan so pandonasyon unong ed nasarag na mangiter.—1 Cor. 16:2.
Matalek itayo a pakiwasen na espiritu na Dios iray lingkor to tan saray interesado ed lawak pian mangiter na boluntaryon donasyon a mansalipotpot ed gastos ed amin ya aspekto na sankamundoan a kimey.