Saray Pakabat

◼ Opresin literatura ed Mayo: Sansakey a kopya na Say Panag-Bantayan tan Awake! Sano ompawil ed interesadon totoo, dalawen met iraman so onaatendi ed Memoryal odino ed arum niran teokratikon okasyon balet ta aliwan aktibo a mililimog ed kongregasyon. Iyapasakey ed pangipalima na libron Dayewen so Dios tan panggunaetan a nigapo so panangiyaral na Biblia, nagkalalo la ed saramay niyaralan la na libron Pikakabat tan brosyur a Kakaukolanen. Hunyo: Say balon libro a Manaral Manlapud Sankamaongan a Managbangat. No ibaga na totoo ya anggapoy anak da, iyopresi so brosyur a Kakaukolanen. Hulyo tan Agosto: Dinanman a brosyur so nayarin iyopresi.

◼ Say mangidadaulon manangimaton odino siopaman a pabtangan to so kaukolan a man-audit ed saray kuenta na kongregasyon no Hunyo 1 odino tampol kayari na satan. Sano agawaan la iya, iyanunsio ed kongregasyon kayarin nibasa so ontumbok a report na saray kuenta.

◼ Diad ontumbok iran bulan et ipawit mi ed sikayo iray porma a nakaukolan yo ed kongregasyon parad ontumbok a serbisyon taon. No walaray arum nin porma a nakaukolan yo, nayari yon pedidoen iraya a singa dati, ya usaren so Literature Request form (S-14). Sarayan porma so ipawit ed sikayo ya anggapoy bayar, balet seguradon saray kongregasyon so malabay a mangiter na makatunongan a kontribusyon parad sankamundoan a kimey ta pian ontulong ed gastos ed imprinta tan panangipatulor. Ipangasin imanoen a saray lapel card parad 2004 a Distriton Kombension so nilaktip ed ipawit iran porma, kanian agla kaukolan a pedidoen iraya likud no kulang so nipawit ed sikayo. Balet, kaukolan yon pedidoen so plastik a pananginan na badge panamegley na Literature Request form.

◼ Dakel so suplay tayo a Kingdom Melodies No. 9 ed audiocassette diad sangan opisina. Saray manangipalapag a malabay a nawalaan na saya so man-order ed manangasikaso na literatura pian iter ed sangan opisina katekep na onsublay a Literature Request.