Say Matalonggaring a Kablian na Kakabatan na Dios
1 Moriaen na arum a totoo a nepeg a direktan iyapasakey na saray Tasi nen Jehova iray sagpot da diad itulong ed pakabawasan na saray probleman aarapen na katooan natan. Agnatetebek na saratan a totoo so matalonggaring a kablian na kimey a panagbangat ed Biblia. Mitunosan itan ed insulat nen apostol Pablo: “Say salita na krus [“panamairapan a kiew,” NW] kakulangkulangan ed saray nabalang; bangbalet pakayari Dios ed sikatayo a nilaban.” (1 Cor. 1:18) On, amta tayo a say Kristianon ministeryo so sankaimportantian a kimey a nagagawa natan diad dalin.
2 Magmaong a Bilay Natan: Limitadon tuloy so nagagawaan na saray sagpot na too a manresolbe ed saray problema na katooan. Agnaamper na panangipaakseb na ley so idaraak na krimen. Say bakal so agnapatunda na saray paknaan parad kareenan tan saray puersan managpareen. Agnapaandi na saray programa ed sosyedad so kairapay-bilay. (Sal. 146:3, 4; Jer. 8:9) Diad pidumaan, say mensahe na panarian so mamapasimbalo ed bilay na minilyon diad panutulong ed sikaran mangisulong na balon personalidad a makapaliket ed Dios. (Roma 12:2; Col. 3:9, 10) Diad panggagawa ra ed satan, panggagayagaan da so maabig a kalidad na bilay natan.—1 Tim. 4:8.
3 Sakey a Masnag ya Arapen: Nilikud ed panutulong ed sikatayon natalonaan iray kaplesan a problema ed bilay, ontutulong met ed sikatayo so kakabatan na Dios pian epektibo tayon niplano so arapen. (Sal. 119:105) Satan so mangilegyas ed sikatayo ed andi-kabaliksan a pansagpot a manreporma ed kaplesan a sistema na bengabengatla. (Ecl. 1:15; Roma 8:20) Misalsalamat itayon tuloy lapud agtayo pipirdien so bilay tayo diad panguusil na saray kalat ya agposiblin nadampot! Imbes, iyaapasakey tayo iray sagpot tayo ed seguradon sipan nen Jehova a “saray tawen a balo tan dalin a balo” a panayaman na inkatunong. Sano onsabi so agew na panangukom nen Jehova, napaneknekan a saramay nanmatalek ed kakabatan na Dios so ag-alingo ed desisyon da.—2 Ped. 3:10-13; Sal. 37:34.
4 Anggaman ompatnag ya aliwan praktikal so kakabatan na Dios parad saraman so nigalet la ed “kakabatan ed saya a mundo,” diad tua et satan so alenleneg a praktikal a kurang a tumboken. (1 Cor. 1:21; 2:6-8) Kanian, itultuloy tayon iyabawag ed interon dalin so mensahen manlalapud Dios, a sikatoy ‘saksakey a makabat.’—Roma 16:27.