Estriktoan so Panguusar Yo na Panaon
1. Anton angat so aarapen na totoo natan ed inerman a pasen?
1 Diad panaon tayo a dakel so kagawaan a makagimper na panaon tan trabaho, naiimano na dakel a singano naaaruman so kikimeyan da balet kulang so panaon ed panggawa ra ed saratan. Kasin naiirapan kayon mamasiansia na maabig ya espiritual a rotina? Kasin pipirawaten yoy nawalaan na mas dakel a panaon parad ministeryo? Panon tayon nausar ed sankaabigan so panaon tayo?—Sal. 90:12; Fil. 1:9-11.
2, 3. Antoran angat so papawalaen na teknolohiya ed impormasyon, tan panon a nausisa na balang sakey ed sikatayo so inkasikaton-dili?
2 Amtaen Iray Manadarak na Panaon: Amin tayo so nepeg a mangusisa a panapanaon no panon tayon uusaren so panaon tayo. Oniay ipapaseseg ed sikatayo na Biblia: “Nengneng yo . . . a tinekepan na panlikas no panon so panakar yo, aliwan singa andi-kalakal, noag ingen singa makalakal; ya anamoten yo so panaon, ta saray agew sikara so mauges.” (Efe. 5:15, 16) Konsideraen iray onlelesan angat a makasengeg ed iyaabanti na teknolohiya ed impormasyon. Anggaman mausar iray kompyuter tan arum niran elektronikon kagawaan, nayarin magmaliw iratan a kalot no agtayo estriktoan so panguusar tayo na panaon.—1 Cor. 7:29, 31.
3 Oniay nepeg ya itepet na balang sakey ed sikatayo: ‘Kasin manguusar ak na panaon ed kada agew diad pambabasa odino pangeebat ed saray mensahe ed E-mail a pakaingongotan lambengat? Kasin mabetbet ak ya ontatawag ed telepono odino mangipapawit na text messages nipaakar ed saray agmakanan pamaakaran? (1 Tim. 5:13) Kasin manguusar ak ed Internet ya anggapoy antokaman a gagalak odino basta labat mangiyaalis-alis ed nanduruman istasyon sano manbabantay ak ed telebisyon? Kasin say mabetbet a panggagalaw ko ed kompyuter so manasamsam la na panaon ko ed panagaral na Salitay Dios?’ Nayarin saratan a gegemtan so masilib a manderal ed espiritualidad tayo.—Uli. 12:11.
4. Anton pananguman so ginawa na sakey a kalangweran, tan akin?
4 Usaren a Makabat so Panaon: Saray elektronikon kagawaan so nayarin mangontrol ed panaon tan imano tayo. Oniay inaksobi na sakey a kalangweran a nigalet lan tuloy ed galaw ed kompyuter: “No maminsan sano nanggalaw ak antis kon ompaway diad lawak na ministeryo odino miaral, naiirapan ak a mangiteen ed nonot ko. Naynay lawarin pinonot ko ed saman no panon kon napaaligwas so panggalaw ko kasabik ed abung. Naapektoan so personal a panagaral ko tan regular a panagbasak ed Biblia. Naandi so liket ko ed panaglingkor ed si Jehova.” Lapud amoria to a nakaukolan toy manguman, binural to so amin a galaw ed kompyuter to. “Agaylay irap iman,” so nanonotan to. “Siak so nigalet a tuloy ed saratan a galaw ya agko inilaloan. Balet aliknak met so pirmin intalona lapud amtak a ginawak iman parad pankaabigan ko.”—Mat. 5:29, 30.
5. Panon tayon nasaliw so panaon parad espiritual iran gegemtan, tan panon itayon nagunggonaan ed panggawa ed satan?
5 Nayarin nakaukolan yo so manggawa na ontan iran kundang no walaray bengatla a nakaukolan yon umanen. Nayarian yo kasin saliwen so kapalduay oras ed kada agew manlapud ag-importante iran aktibidad? Ontan labat a karakel na panaon so nakaukolan pian nabasa yo so interon Biblia ed loob na sakey a taon. Agaylan satan so makagunggona ed espiritual! (Sal. 19:7-11; 119:97-100) Mangigana na panaon parad pambasa ed Biblia, pamparaan ed miting, tan parad lawak na ministeryo. (1 Cor. 15:58) Say panggawa ed satan so ontulong ed sikayon nakontrol iray manadarak na panaon tan ontulong ed sikayon ‘mantultuloy a mantalos ed no anto so linawa na Katawan.’—Efe. 5:17.