Saray Pakabat
◼ Opresin literatura ed Enero: Nayarin iyopresi so dinanman a daan a libron walaan na 192 a pahina. Saraman so andian na saray daan a libro so nayarin mangiyopresi ed Mankind’s Search for God. Pebrero: Iyopresi so libron Onapit ed si Jehova. Marso: Iparungtal so libron Pikakabat, tekep na kalat a nigapo iray panangiyaral ed Biblia. No walaan la so totoo na sayan publikasyon, nayarin iyopresi so Pay Attention to Daniel’s Prophecy! Abril tan Mayo: Sansakey a kopya na Say Panag-Bantayan tan Awake! Sano manggagawa na saray panagpawil ed interesadon totoo, dalawen met iraman so onaatendi ed Memoryal odino ed arum a teokratikon okasyon balet ta aliwan aktibo a mililimog ed organisasyon. Iyapasakey ed pangipalima na libron Dayewen so Dios. Panggunaetan a nigapo so panangiyaral na Biblia, nagkalalo la ed saramay akapan-aral la ed libron Pikakabat tan ed brosyur a Kakaukolanen.
◼ Saray kongregasyon so nepeg a manggawa na saray uksoyan ed panselebra na Memoryal ed sayan taon no Simba, Abril 4, 2004, kaselek na agew. Saray miting a kaslakan a gagawaen ed Simba so nepeg a gawaen ed arum ya agew ta pian say Memoryal labat so nagawan miting ed Abril 4. Anggaman nayarin igapon masasakbay so paliwawa, say pangipasa na saray emblema ed Memoryal so agnepeg ya igapo no agni sinmelek so agew. Lapud anggapoy arum a miting a nagawa ed satan ya agew nilikud ed miting parad lawak na kimeyan, nepeg a matukoy ya iyarunsa so pangikondukta ed Panagaral na Panag-Bantayan diad arum ya agew. Saray manangasikaso na sirkito so kaukolan a mangiyarunsa ed eskedyul na miting da ed satan a simba unong ed saray kipapasen ed lokal. Anggaman maabig no selebraan na kada kongregasyon so dilin Memoryal da, nayarin saya so aliwan naynay a posible. Diad pigaran kongregasyon a kaslakan a manguusar na saksakey a Kingdom Hall, nayarin say sakey odino onsulok ni so mangusar na sananey a pasilidad parad satan a labi. No posible, isusuheri mi a 40 minutos so panbaetan na saray programa pian amin so sigpot a nagunggonaan ed satan ya okasyon.
◼ Lapud say Abril tan Mayo so espisyal iran bulan parad magasin tan dakel so man-auxiliary payunir legan na satan, nepeg ya ikonsidera la natan na manangasikaso na serbisyo tan say agin mangaasikaso ed magasin so pan-order na ekstra iran magasin ya usaren na kongregasyon diad saratan a bulan. Ipangasin ipawit la iray espisyal ya order yo pian makasabi iratan diad sanga ya ag-onlampas ed Pebrero 1, 2004. Saya so maneguro a naawat yo iray ekstran magasin a kabansag na regular ya order yo.
◼ Manlapud Marso 15, 2004, ya anggad Mayo 16, 2005, say libron Onapit ed si Jehova so aralen diad Panagaral na Kongregasyon ed Libro. Saramay mankaukolan na libro parad panagaral so kaukolan a man-order la natan.
◼ Balon Publikasyon a Wala:
The Guidance of God—The Way to Paradise—Tausug (Paimano: Sayan brosyur a parad saray Muslim so wala la natan ed sakey ed saray dilin lenguahe ra.)