“Onla Itayo ed Abung nen Jehova”

¹ Si David so magunaet a kinmiwas ed imbitasyon ya: “Onla itayo ed abung nen Jehova.” (Sal. 122:1) Say “abung” nen Jehova nensaman et pasen a pantitiponan na saramay malabay a mandayew ed tuan Dios. Natan et say sankamundoan a Kristianon kongregasyon so “abung” na Dios, sakey a “lusek tan sakurong na katuaan.” (1 Tim. 3:15) Amin a probisyon parad kilalaban so nitatarya panamegley na sayan paralanan. Lapud satan, nepeg a “saray amin a nasyon unagus ira ya angga ed sikato” no kaliktan da so manggayaga ed saray bendisyon na Panarian na Dios.​—Isa. 2:2.

² Sayan “abung” so tutugyopen na masulok a 94,000 a kongregasyon ed 234 a daldalin. Akalukas iray puerta na Kingdom Hall diad sankamundoan, a wala so masulok ya anemiran milyon a maseseg a komikimey a mangiimbita a: “Gala. . . . Et say malabay, mangala ed danum na bilay ya andi-bayar.” (Apoc. 22:17) Manbibilay itayo natan ed mapeligron panaon, a maples a manasingger so anggaan na sayan sistema. Kanian pankaganatan a sabien iray totoo pian ‘niyasingger ira ed Dios’ panamegley na iyapit ed organisasyon to. (Sant. 4:8) Panon tayo ran natulongan?

³ Iwanwan Ira ed Organisasyon: Diad primeron pakapitongtong tayo ed interesadon totoo, nepeg tayon ipaarap so imano ra diad organisasyon. Nayarian tayon ipaliwawa ed sikara a manlalapud organisasyon so amin a naaaralan tayo, ya ipaparalan ed aripen a klase a mangitatarya na “tagano ed panaon a kinepeg to.” (Mat. 24:45-47) Diad gapo ni labat et kaukolan lan namoria na saray balo ni ya aliwa labat a say lokal a kongregasyon so lalanoren na puron panagdayew; wala so organisado, teokratiko, tan sankamundoan a sosyedad ya onkukurang diad panangidirehi nen Jehova.

⁴ Ipaamta ed saray interesado so address na lokal a Kingdom Hall pati saray oras na miting. Ipaliwawa iray pandumaan na saray miting tan saray relihyoson pantitipon a nayarin aatendian da ed apalabas. Amin so naabrasa tan anggapo iray panagkolekta odino personal a pankerew na kuarta parad pundo. Anggaman saray aturon ministro so mangikokondukta ed saray programa, amin so walaan na pankanawnawan mankomento tan mibiang ed saray parte na programa. Naabrasa iray pamilya; kabiangan so ugugaw ed saray diskusyon nipaakar ed Biblia. Say Kingdom Hall et simpli tan anggapo iray kandila, rebulto, odino imahen. Nayarian yon ipaliwawa a maslak ed saramay onaatendi so manaayam ed lokal a komunidad.

⁵ Progresibon Ipaarap so Interes Da ed Saray Panagaral ed Biblia: Nilikud ed pangibangat na katuaan ed Biblia, say panagaral ed Biblia so nepeg met a mamabiskeg ed iyaaralan a mangapresya ed organisasyon nen Jehova tan ontulong ed sikaton natebek a kaukolan toy magmaliw a kabiangan ed satan. Nen inmunan siglo, tinipon na saray babangatan nen Jesus iray masimoon a totoo ed saray kongregasyon diad panangidaulo na mananguley ya ulop. Saramay akilimog so apabiskeg ed espiritual tan atulongan iran mansungdo ed kairapan. (Heb. 10:24, 25; 1 Ped. 5:8-10) Diad panaon tayo, gagala nen Jehova a ‘natipon iray amin a bengatla ed Kristo.’ (Efe. 1:9, 10) Bilang resulta et walaan itayo na sankamundoan ya “impanaagi.”​—1 Ped. 2:17.

⁶ Mangigana na pigaran minuto diad panagaral yo ed Biblia kada simba pian isalaysay odino deskribien so nipaakar ed organisasyon tan no panon ya onkukurang itan. Naromog yo so makatulong a materyal diad brosyur a Jehovah’s Witnesses​—Who Are They? What Do They Believe? Sisingbaten na sayan brosyur iray manunan aspekto na organisasyon tan no panon a say iyaaralan so nagunggonaan ed saratan. Nayarian yo met ya iyarunsa no posible so pambantay na saray iyaaralan ed videon Jehovah’s Witnesses​—The Organization Behind the Name. No asingger kayo ed Bethel, nayarian yon iyarunsa so pan-tour na saray iyaaralan yo, pian nanengneng dan mismo no panon ya onkukurang so organisasyon. Agamoran na arum iray maabig a resulta diad impangiter da ed saray iyaaralan na sakey a kopya na 2003 Yearbook a basaen da, lapud espesipikon isasalaysay na satan so nipaakar ed awaran na kimey diad Pilipinas. Wala ni so magenap a kopya tayo na sayan Yearbook diad Bethel ed Cebuano, Iloko, Ingles, tan Tagalog, kanian papasesegen mi iray mamatatken a man-order na pigara a nausar na saray agagi diad panangiyaral da ed Biblia.

⁷ Makatulong met so pangikabat ed sikara diad arum a Tasi pian onlaknab so ideya ra nipaakar ed organisasyon. Imbitaan so arum a manangipalapag a mangiba ed pangiyaral a panapanaon. Ompan nayarian yon itagar so sakey a matatken pian nakabat da met. Say pangiyarunsan nakaiba so manangasikaso na sirkito odino say asawa to diad pangiyaral so peteg a makagunggona.

⁸ Pasesegen Iray Balo ni ya Onatendi ed Saray Miting: Kaukolan a namoria na saray balo ni so kaimportantian na iyatendi ed saray miting. Panggunaetan a sagyaten so interes da. Ipabitar iray artikulo a nasingbat diad Panagaral na Panag-Bantayan. Salambiten so ontumbok a tema na publikon paliwawa. Isalaysay iray pabitar ed materyal a nasingbat diad Teokratikon Eskuelaan Parad Ministeryo tan Panagaral na Kongregasyon ed Libro. Ibaga ed sikara no panon kayon nagugunggonaan a maong ed iyaatendi yo ed saray miting tan no akin ya importante ed sikayo so iyatendi.

⁹ Sano onatendi ed miting so iyaaralan yo na Biblia, sikatoy abrasaen yo. Ipakabat yo ed arum, pati ed saray mamatatken. No sikatoy onatendi ed publikon paliwawa, ipakabat yo ed espiker. Ipanengneng ed sikato so kaliberliber na Kingdom Hall, ya ipaliwawa ed sikato so gagala na saray despatso na literatura tan magasin, saray kahon parad kontribusyon, librarya, tan teksto ed taon. Ipaamta ed sikato a say Kingdom Hall et aliwa labat ya abung a panagdayewan noagta sentro met itan na panagpulong a kimey.

¹⁰ Ipaliwawa no panon ya ikokondukta iray miting. Ipabitar a say Biblia so manunan libron panaaralan tayo tan saray publikasyon tayo so katulongan ed panagaral ed Biblia. Ipaliwawa ya amin a musika tan liriko ed libron panagkantaan tayo so kinompos na saray Tasi nen Jehova pian usaren ed panagdayew tayo. Ipaimano so nanduruma a kipapasen na saray onaatendi. Mankomento na positibo nipaakar ed inkamakaaro tan inkamaparawes. Sayan maaron interes so nayarin sakey ed saray sankabiskegan a mamakiwas ed estudyante pian onatendi lamet.

¹¹ No Akin a Nayarin Masuyat so Arum: Anggaman ed amin a gagawaen yo, mabetbet a say arum so masuyat ya onapit ed organisasyon. Ag-onsusuko a tampol. Panggunaetan a talosan so liknaan da. Nayarin ag-ira apasal ya onatendi ed saray relihyoson pantitipon nilikud no walaray espisyal ya okasyon. Nayarin dedesdesen ira na saray membro na pamilya odino kakaaro ra. Nayarin papagyawen ira na kakaabay da. Ontan met, nayarin sikaray okupado ed saray materyal a pankaukolan da odino nasesebelan lapud sosyal iran gegemtan. Nayarin kaukolan yo ran tulongan a nawalaan na dugan punto de bista tan “abobonan so bengatla ran sankaabigan.”​—Fil. 1:10.

¹² Mangiter na Makasulatan iran rason pian sikaray mantultuloy. Idanet a mankaukolan itayon amin na panamaseseg tan espiritual a panamabiskeg a naawat tayo diad panlilimog tayo. (Roma 1:11, 12) Impabitar nen Jesus a say isusumpa na pamilya so aliwan makatunongan a rason pian ontunda. (Mat. 10:34-39) Nepeg a daegen iray personal a gegemtan tan pakasbelan; ta no andi et magmaliw iratan a kalot. (Luc. 21:34-36) Nepeg a saramay makanepegan ed bendisyon nen Jehova so magmaliw ya interon-kamarerwa, aliwan nankadua so puso. (Col. 3:23, 24) Say pangipurek ed sikaran mangapresya ed saratan a prinsipyo ed Biblia so nayarin mangilukas na dalan pian onaligwas ira ed espiritual.

¹³ Akalukas Iray Puerta: Say abung nen Jehova parad tuan panagdayew so nipaatagey manlapud arum. Say imbitasyon so nipapaknol la ed 234 a daldalin diad sankamundoan: “Dago kayo, . . . ontatdang itayo ed palandey nen Jehova, . . . ta ibangat to itayo ed saray dalan to, tan manakar itayo ed saray basbas to.” (Isa. 2:3) Say positibon ikiwas na saray balo ni so makapangisalba ed bilay da. Say pangiwanwan ed sikara ed organisasyon nen Jehova so sakey ed saray sankaabigan a paraan pian natulongan tayo ra.