Padaaken so Pangipalima Tayo na Magasin
1 Diad loob la na 124 a taon, Say Panag-Bantayan so onkakana bilang manangidepensa na katuaan na Panarian tan natan et masulok a 25 milyon na kada paway na satan so nipapalapag ed 147 a lenguahe. Say Awake! met so abayag lan mangiyaalibansa ed Salitay Dios tan masulok a 22 milyon na kada paway so nipapalapag ed 85 a lenguahe.—Ikompara so Colosas 1:23.
2 Pepeneken na Saray Magasin so Espiritual a Pankaukolan: Saray magasin tayo so ontutulong ed sikatayon mansiansian alerto ed espiritual tan aktibo ed panaglingkor tayo ed si Jehova. Lugan met na saratan iray praktikal ya artikulo nipaakar ed maridios a kondukta tan saray Makristianon moralidad. Bilang resulta et panggagayagaan tayo so atagey a kalidad na bilay natan legan ya aalagaren tayo iray magmaong a bengatla ya insipan nen Jehova.—Isa. 48:17; 1 Tim. 6:19.
3 Balet saray magasin tayo so nipapalapag ya aliwan para labat ed saray Tasi nen Jehova. Singa ipapanengneng na saray bilang ed parapo 1, minilyon a totoo ya aliwa iran Tasi so maliket a manbabasa ed saray palapagan tayo tan dakel la so akaamta ed katuaan diad pambabasa ra.
4 Magmaliw a Mabunlok a Mangiyopresi ed Saray Magasin: Diad 1 Timoteo 6:18, papasesegen itayo a magmaliw a ‘mapalangkap, mainomay a mangiter,’ tan laktipen na saya so panagbunog tayo na magasin. Mabetbet a masuyat iray manangipalapag a mangitilak na saray magasin no say unabung et agmankontribusyon parad sankamundoan a kimey. Balet, agta magmaong no magmaliw itayon ‘mapalangkap’ odino mabunlok ta pian amin a malabay a manbasa na saray magasin tayo so nawalaan na pankanawnawa a manbasa ed saratan? Siempre, agtayo labay ya itilak iray magasin ed saray totoo ya andian na interes tan agmanbasa ed saratan, balet diad biek a dapag, agtayo abuloyan a mangamper ed sikatayo so agpakapankontribusyon no apatnagan so puron interes.
5 Anggaman ontan, ta pian dakel so nipalima a magasin, kaukolan tayoy magenap a suplay. Isusuheri a kada manangipalapag tan payunir so nawalaan na regular ya order ed mangaasikaso na magasin pian nawalaan ira na magenap ya ipalima. Kasin walaan kayo na personal ya order? Kaukolan ya iyuksoy na saray mangaasikaso na magasin so pangawat na personal iran order kayarin nabasa iyan artikulo insan, no kulang so suplay na kongregasyon, nayarin ipawit so order ed sangan opisina pian aruman so suplay na magasin.
6 Ibabaga na Eclesiastes 11:6: “Dia ed kabuasan itanem mo so binim, tan dia ed labi agmo ipiko so limam; ta agmo amta no anto so onaligwas.” Say panagbunog na magasin et aliling toy panagtanem na bini. Kanian magmaliw a mabunlok a mangitanem ed saratan tan manmatalek ed si Jehova a pabulaslasen to iratan ed dugan panaon.—1 Cor. 3:6.