Pisasalamat ed Panangasi na Dios
1 Sakbay a nagmaliw a Kristiano, si apostol Pablo so pirmin onsusumpa ed ikakayat na Inkakristiano. Balet, lapud kinmiwas ya andi-pikakabat, sikatoy pinagamoran na panangasi. Impatnag nen Jehova so agkanepegan a kaabigan, tan naikdan si Pablo na asainmin a manpulong. Pinabli ton tuloy itan ya asainmin. (Gawa 26:9-18; 1 Tim. 1:12-14) Say pisasalamat ed panangasi nen Jehova so amakiwas ed si Pablo a mangideboto ed inkasikato pian sumpalen so ministeryo to.—2 Cor. 12:15.
2 Apagamoran itayo met na ministeryo lapud panangasi na Dios. (2 Cor. 4:1) Singa si Pablo, nipatnag tayoy apresasyon tayo ed panangasin impatnag ed sikatayo diad panggunaet tayon ontulong ed arum ya onaligwas ed espiritual. Say sakey a paraan a nagawaan tayo itan et diad pangigapo tan pangikondukta tayo na saray panagaral ed Biblia.
3 Pangigapo na Saray Panagaral ed Biblia: Sakey a paraan pian nigapo iray panagaral ed Biblia et diad pangiletneg na rota na magasin. No maparanay tayon bibisitaen iramay kabiangan ed rota tayo, lalon naamtaan tayo iray kapagaan da. Diad kaunoran et nausar tayo so sakey ya artikulo ed saray magasin ed pangigapoy panangiyaral na Biblia diad brosyur a Kakaukolanen. Diad ontumbok iran ibisita et posiblin nituloy so paningbat ed brosyur a Kakaukolanen sano mangipalima lamet na saray magasin ed unabung.
4 Nakaukolan so Pampikasi tan Pansagpot: Say pikakasi a tinekepan na inkaseet so mamalaknab ed panagpulong tayo. Sakey ya agin biin payunir a saksakey so iyaaralan to na Biblia so nampikasi ed si Jehova a naaruman ni komon. Sikatoy kinmiwas met unong ed saray pikakasi to. Inusisa to so ministeryo to tan naimano to ya agto iyoopresi iray panangiyaral na Biblia sano manggagawa na saray panagpawil. Ginapoan ton ginawa itan tan ag-abayag et awalaan ni na duaran iyaaralan.
5 Agaylan pribilehyo tayo so mibiang ed pangipakabat ed “maong a balita nipaakar ed agkanepegan a kaabigan na Dios”! (Gawa 20:24, NW) Komon ta say pisasalamat ed panangasi na Dios so mamakiwas ed sikatayon manseet ed panulong ed arum pian minabang ira ed agkanepegan a kaabigan nen Jehova.