Walaan na Depekto ed Laman—Ingen ta Mabunga
1 No sakey kayo ed saray dakel a Tasi nen Jehova a walaan na depekto ed laman, sarag yo nin siansia so nawalaan na mabungan ministeryo. Diad tua, lapud kipapasen yo et nayarin nawalaan kayo na nikaduma iran pankanawnawa pian makapantasi tan mamaseseg ed arum.
2 Saray Pankanawnawa a Makapantasi: Dakel ed saraman so mipupuligesgesan ed depekto ed laman da so sigpot a makapipibiang ed ministeryo. Alimbawa, sakey ya agin biin naapektaan so kakaakar tan panagsalita to lapud operasyon so akaimano a nayarian toy makapibiang ed panagmagasin a kimey no iparada na asawa to so luluganan da ed kaslakan a dadalanan. Aminsan et sikatoy akapangipalima na 80 a magasin diad loob lambengat na duaran oras! Lapud nikaduman kipapasen yo et nayarin nakatongtong yo iray totoo ya agnasasabi ed abung. No ontan, moriaen iratan bilang espisyal a teritorya yo.
3 Nayarin epektibon tuloy so panagpulong yo! Legan a naiimano na arum so determinasyon tan maabig ya epekto na katuaan na Biblia ed bilay yo, nayarin nasagyat ira ed mensahe na Panarian. Niarum ni, sano makaromog kayo na totoon manasagmak na kairapan, say eksperiensya yo ed bilay so mangiparaan ed sikayo a manligliwa ed sikara manlapud Salita na Dios.—2 Cor. 1:4.
4 Pabiskegen so Arum: Agta apaseseg kayo ed istorya ed bilay nen Laurel Nisbet, ya akarukol ed makina a panlilinawaan to diad loob na 37 a taon balet ta akatulong ed 17 ya indibidual a kinmamang ed katuaan ed Biblia? Mipadpara met, say ehemplo yo so mamaseseg ed saray kapananisiaan a mansagpot diad panaglingkor ed si Jehova.—g93 1/22 p. 18-21.
5 Anggaman lapud kipapasen yo et agkayo mabetbet a makapanpulong a singa kalkaliktan yo, napaseseg yo nin siansia iray arum. Oniay inkuan na sakey ya agin laki: “Nalmoan ko ya anggan say walaan na pirmin depekto a too so baleg a tulong ed arum. Sikami nen akulaw ko so ontutulong ed nanduruman agagi diad kongregasyon. Lapud kipapasen mi et lanang kamin wadia, lanang ya akaparaan.” Balet, makasengeg ed depekto na laman, natalosan ya agyo lawas nagawaan so unong ed seseg yo. Anggaman ontan, diad tulong na arum et nayari kayon maparanay a makapibiang ed ministeryo. Kanian, no kaukolan yo so tulong, agnababaingan a salambiten iya ed saray mamatatken odino ed saray arum diad kongregasyon a makatulong ed sikayo.
6 Nanenengneng nen Jehova so amin a gagawaen yo pian sikato so panlingkoran, tan panggagayagaan to so interon-kamarerwan serbisyo yo. (Sal. 139:1-4) Leleg a manmamatalek kayo ed sikato, pabiskegen to kayo pian nawalaan na mabunga tan makabaliksan a ministeryo.—2 Cor. 12:7-10.