Angimatalekan na Maong a Balita
1 Agaylan apribilehyoan itayo lapud nimatalek ed sikatayo so maong a balita na Dios! (1 Tes. 2:4) Anggaman walaray agmangawat ed sayan mapuersan mensahe, saray matuan impanpuso so natatangguyor ed balingit na satan. (2 Cor. 2:14-16) Parad saraman so mangawat tan ontulok ed maong a balita, mankabaliksan itan na kilalaban. (Roma 1:16) Antoy nepeg tayon gawaen ed sayan nimatalek ed sikatayo?
2 Si Jesus tan Saray Apostol: Inyuna nen Jesus so panangiyabawag ed maong a balita. (Luc. 4:18, 43) Anggan sanen sikatoy naksawan tan narasan, lapud panangaro to ed totoo tan panamabli to ed mensahe et sikatoy apakiwas a manginabang ed satan ed arum. (Mar. 6:30-34) Diad panamegley na salita tan walna to et nipaslep to ed nonot na saray babangatan to so kaimportantian na pangipulong ed Panarian.—Mat. 28:18-20; Mar. 13:10.
3 Diad impangalig ed si Jesus, maseseg ya inyabawag na saray apostol so mensahe na Panarian. Anggan sanen sikaray pinekpek tan patutundaen a manpulong, “ag-ira tinmunda a nambabangat tan nampupulong.” (Gawa 5:40-42) Agkinmesaw si apostol Pablo ed sayan kimey. (1 Cor. 15:9, 10; Col. 1:29) Impasen ton otang to ed kapara ton totoo so pribilehyo a panginabang ed maong a balita, tan sikatoy mabulos a mangisakripisyo ed personal ya inkakombiniente ta pian nagawaan to itan.—Gawa 20:24; Roma 1:14-16.
4 Say Pribilehyo Tayo Natan: Lapud panamabli ed sagradon kimey a nimatalek ed sikatayo et napakiwas itayon mananap na saray paraan pian napalaknab tayoy pibibiang tayo ed panagpulong a kimey. (Roma 15:16) Si Edward, ya aka-wheelchair, so ompuepuesto diad lolooban na sakey a hotel tan itongtong to ed saray totoon ontutuloy ditan so nipaakar ed pananisia to. Anggaman ontan, lapud pilalek ton napalaknab ni kimey to, sikatoy nampagawa na nikadkaduma a compartment ya indesinyo ed sakey a pickup a luluganan, tan diad panamegley na satan a luluganan et sikatoy makapanpapayunir ed loob na dakel lan taon, a manbiabiahe na nilibon kilometro. Singa si Edward, dakel natan so angiyarunsa ed saray sirkumstansya ra pian makapibiang a nagkalalo ed pangikayat ed maong a balita.
5 Bilang panangalig ed si Jesus tan ed saray apostol, komon ta lawas tayon iyuna ed bilay tayo so panagpulong a kimey natan. Diad panggawa ed satan, nipanengneng tayoy panangaro tayo ed totoo ontan met ed panamabli tayo ed maong a balita a nimatalek ed sikatayo.