“Onsisinag Bilang Liwawa”
1 Anggaman ed makapasinagem iran kipapasen ed espiritual tan moral na sayan peles a sistema na bengabengatla, manga anemiran milyon a managdayew ed tuan Dios a Jehova so “onsisinag bilang liwawa” ed 234 a daldalin diad sankamundoan. (Fil. 2:15, NW) Lapud saya et sikatayo so sankaimano. Panon tayon nisisindag so mablin liwawa na katuaan a manlalapud si Jehova?—2 Cor. 3:18.
2 Saray Kiwas Tayo: Main-inomay a naimano na totoo so kondukta tayo. (1 Ped. 2:12) Naimano na sakey a bii so katrabahoan ton Tasi a mapangasi, matulong, tan agmabanday ed panagsalita odino agmieelekan ed saray mabanday a lurey. Sanen say Tasi so diretsaan a pinasyodot na arum, sikatoy nansiansian kalmado labat balet ta mapekder ed no antoy maptek. Antoy epekto na saya ed samay bii? Nanonotan to ni: “Lapud pandinayew kon maong ed kondukta to et siak so nantetepet ed sikato nipaakar ed Biblia. Ginapoan ko met lay manaral na Salitay Dios tan diad saginonor et siak so nampabautismo.” Inyarum to ni: “Say kondukta to so anangguyor ed siak pian usisaen iray sisiaen na saray Tasi nen Jehova.”
3 Say awawey tayo ed autoridad, say panmoria tayo ed minumundon agagamil, tan say malinis a panagsalita tayo so rason no akin a naiimano iray Tasi nen Jehova bilang totoon manbibilay unong ed saray atagey ya estandarte ed Biblia. Saratan a maabig a gawa so makapangigloria ed si Jehova tan managyat ed arum a mandayew ed sikato.
4 Saray Salita Tayo: Siempre, nayarin ag-amta na saramay makakaimano ed maabig a kondukta tayo no akin a sikatayoy duma no agtayo itongtong ed sikara iray sisiaen tayo. Kasin saraman so katrabahoan odino kaeskuelaan mo et amta ran sakey ka ed saray Tasi nen Jehova? Kasin aanamoten moray pankanawnawa a manpulong sano katongtong mo ira? Kasin determinado ka ‘a mangisindag na liwawam ed totoo’ ed kada matukoy a pankanawnawa?—Mat. 5:14-16, NW.
5 Say panumpal ed kimey tayo bilang manangakbibit na liwawa et kakaukolanen toy dilin-managsakripisyon awawey. Say sigpot-puson awawey so mamakiwas ed sikatayon ipulisay iray agtanton importantin bengatla ta pian dakel ni so nagawaan tayo diad manangiliktar na bilay a kimey a panagpulong tan panaggaway babangatan.—2 Cor. 12:15.
6 Diad saray kiwas tan salita tayo et mantultuloy itayo ya onsinag bilang liwawa. No ontan so gawaen tayo, napakiwas so arum a miulop ed sikatayon mangigloria ed si Jehova.