Mankontento ed No Anto so Wala ed Sikayo
1 Papasesegen itayo na Kasulatan a mangitarya parad sankaabungan tayo, balet nepeg ya aliwan saya so manunaan a kalat tayo ed bilay. Nakaukolan ya unona niray espiritual a bengatla. (Mat. 6:33; 1 Tim. 5:8) Say pagmaliw a susto ed inkabalanse so sakey ya angat diad sarayan “maatap a panaon a mairap a pidenengan.” (2 Tim. 3:1, NW) Anto so ontulong ed sikatayon nagawaan iya?
2 Iyadapta so Panmoria na Biblia: Ipapasakbay ed sikatayo na Salita na Dios a say pangegemtan ed kaykayamanan so pansengegan na kaderal na espiritualidad. (Ecl. 5:10; Mat. 13:22; 1 Tim. 6:9, 10) Diad sayan makatantandan panaon, makadesyang ed siopaman ed sikatayo so pagmaliw ya okupadon tuloy ed sekular a trabaho odino pinansyal iran kapagaan ya ipasen tayo iray espiritual a kimey, salanti, saray miting, panagaral, tan panaglingkor, ya onkomadua labat ed bilay tayo. (Luc. 21:34-36) Diad kasunian, say Biblia so manisimbawa: “No wala siri pantagano tayo tan kawesen tayo pasaragen tayo komon ya.”—1 Tim. 6:7, 8.
3 Agkabaliksan na saya a kakaukolanen ed saray Kristiano so manbilay ed dilin-impaakseb ya inkaduka. Noagta satan so ontutulong ed sikatayon nabidbir no antoran talaga so materyal a kaukolan tayo—say tagano, kawesen, tan panayaman a magenap ed kawalaan tayo. No walaan itayo na saray manunan nakakaukolan ed bilay, nepeg ya ag-itayo la mantultuloy a manpilalek ed mas atagtagey ya estandarte na kabibilay. Sano iisipen so pangaliw odino pangawat na kaaruman a trabaho, maabig no itepet tayo ed inkasikatayo, ‘Kasin talagan kaukolan iya?’ Say panggawa na ontan so ontulong ed sikatayon talinengen so pinuyanan a konseho: “Nabulos kayo komon a manlapu ed aro na pilak, panliketan yo so bengatla a wala ed sikayo.”—Heb. 13:5.
4 No manmatalek itayo ed si Jehova, tulongan to itayo. (Uli. 3:5, 6) Anggaman kaukolan tayo so pansagpot pian nawalaan na inagew-agew iran pankaukolan, agtayo isesentro so bilay tayo ed saratan a bengatla. Balanglan andian odino walaan tayo, onsasaral itayo ed si Jehova a peneken to iray pankaukolan tayo. (Fil. 4:11-13) Bilang resulta, panggagayagaan tayo so maridios ya inkakontento tekep na dakel niran bendisyon.
5 Aligen so Pananisia na Arum: Sakey a mansusulon ateng a mamapabaleg ed anak ton bii ed dalan na katuaan so progresibon amasimpli ed bilay to. Anggaman panggagayagaan to so mainawan bilay diad ayaman to, sikatoy inmalis ed memelag ya abung insan diad sakey ya apartment. Akatulong iya ed sikato a nabawasan so oras ya uusaren to diad panagtrabaho pian nideboto to so dakel ya oras to ed ministeryo. Sanen binmaleg la so anak ton bii tan akiasawa, nan-retiro ya asakbay so ina, anggaman kabaliksan na saya ya ondaiset so almo to. Say agi tayon bii natan so wala la’d koma-piton taon to bilang regular payunir tan agto pagbabawian so impangisakripisyo to ed materyal pian niyuna so intereses na Panarian ed bilay to.
6 Sakey a matatken tan say akulaw to so nampayunir ed dakel lan taon legan a papabalegen daray taloran anak da. Bilang sakey a pamilya, naaralan da so mankontento a peneken iray kaukolan da imbes a peneken iray kaliktan da. Oniay inkomento na agin laki: “Kaukolan a manbilay kami a mas simpli. Anggaman walaray asagmak min mairap a panaon, lawas intarya nen Jehova iray nakaukolan mi. . . . Sano nanenengneng kon iyuuna na pamilyak so espiritual iran bengatla, naliliknak ya amin a bengatla so maayos, tan naliliknak so itatalona.” Inyarum na akulaw to: “Sano nanenengneng ko [so masiken ko] ya okupado ed espiritual iran pamaakaran, naliliknak so pirmin inkakontento.” Maliket met iray anak a denesidi na atateng da so manlingkor ed si Jehova a sigpot-panaon.
7 Diad amin na saraman so mamipili ed ontan a kurang na maridios a debosyon imbes a say pangegemtan ed materyal iran bengatla, isisipan na Biblia iray daakan a bendisyon natan tan diad bilay ya onsabi.—1 Tim. 4:8.